Қоровулбозор туман ҳокими Ўткир Ҳамроевнинг давлат хизматчилари ва туман аҳолисига мурожаати !
2026-03-07 09:05:00 / Раҳбариятнинг баёнотлари ва нутқлари
Муҳтарам Президентимиз Шавкат Мирзиёев томонларидан 2025-йил 26-декабр куни Ўзбекистон Республикаси Олий Мажлиси ва халқига йўллаган Мурожаатномада коррупсияга қарши курашиш масаласи давлат сиёсатида энг устувор йўналиш сифатида яна бир бор қатъий белгилаб берилди.
Давлатимиз раҳбари алоҳида таъкидлаганларидек, Коррупсия – давлат тараққиётига тўсиқ бўладиган, адолат ва қонун устуворлигини издан чиқарадиган, жамиятда ишонч муҳитини заифлаштирадиган энг жиддий таҳдиддир. Коррупсияга йўл қўйиш эса – ислоҳотларимизга хиёнатдир.
Шу боис 2026 йилда коррупсияга қарши курашиш соҳасида “фавқулодда ҳолат” эълон қилиниши бутун давлат бошқаруви тизими учун жиддий огоҳлантирув ва масъулиятдир.
Дарҳақиқат, Ислоҳотлар йўлидаги энг катта тўсиқ ва ғов – бу коррупсиядир. Ривожланиб бораётган мустақил мамлакатимизда эркин ва озод ҳаётимизга қора доғ, иллат бўлиб келаётган коррупсияга қарши кураш бугунги куннинг энг долзарб вазифаси бўлиб қолмоқда.
Жамиятда коррупсияга нисбатан муросасиз муносабат қарор топтириш ўта долзарб масала бўлиб, унинг тўлақонли рўёбга чиқиши учун ҳар бир фуқаро ўзида масъулият ҳис этса, қўйилган мақсад ва муддаолар ечими пайдо бўлади.
Бу курашда биз ҳам бефарқ бўлмаслигимиз лозим. Янгича фикрлашга ўтишимиз, коррупсияга ундовчи омилларни очиқчасига муҳокама қилиб, биз ҳам умумий курашга қўшилмоғимиз даркор.
Бу иш бутун жамият аъзоларини, шу Ватаннинг ҳар бир онгли фуқаросини, фарзандлари келажагига бефарқ бўлмаган инсонларнинг кундалик вазифаси бўлмоғи лозим.
Қадрли тумандошлар !
Халқимизнинг том маънодаги адолат қарор топган жамиятда яшаши учун нафақат масъул шахслар, балки ҳар бир фуқаро ўз ҳиссасини қўшиши зарур. Ҳар қандай қонунбузарликлар содир этилиши ва кўпайишига кўп ҳолларда ўзимизнинг бефарқлигимиз, лоқайдлигимиз сабаб бўлмоқда. Барчанинг бирдамлиги, якдиллиги ҳар қандай иллатнинг батамом барҳам топишига хизмат қилади.
Коррупсияга қарши кураш — фақат давлат идораларининг эмас, бутун жамиятнинг умумий вазифаси. Ҳалоллик, адолат ва қонун устуворлиги ҳар биримиздан бошланади. Лоқайдлик, бепарволик, порахўрлик, коррупсия, сохтакорлик, мансаб ваколатини суистеъмол қилишга қарши кураш бутун жамиятнинг мақсадига айланмоғи керак.
Коррупсияга муросасиз муносабатни шакллантириш, туманимизни бу борада ҳалоллик намунасига айлантириш йўлида барчангизни фаолликка чорлаймиз.
Албатта, ҳаммамиз ягона куч бўлиб ҳаракат қилсак, катта ижобий самарага эришамиз.
Шу боис маҳалла фаоллари, нуронийлар, зиёлилар, тадбиркорлар, раҳбарлар, депутатлар – умуман бутун жамоатчилик бирлашиб, коррупсияга қарши курашмоғимиз лозим.
Ҳурматли тумандошлар !
Сизларни ҳалоллик ва покликни ҳаётий тамойил сифатида қабул қилишга, коррупсияга қарши курашда фаол бўлишга чақираман.
Зеро, Коррупсияга қарши курашиш –барчамизнинг бурчимиз.