Тазйиқ ва зўравонликдан жабрланган шахсларга ижтимоий хизматлар кўрсатиш тизими янада такомиллаштирилиши муносабати билан Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисидаги Қонунининг мазмун-моҳияти
2026-09-23 09:00:00 / Раҳбариятнинг баёнотлари ва нутқлари
Сўнги йилларда мамлакатимизда хотин-қизларнинг ҳуқуқлари, эркинликлари ҳамда қонуний манфаатларини тазйиқ ва зўравонликдан ишончли ҳимоя қилиш, тазйиқ ва зўравонликдан жабрланган хотин-қизларга ҳамда уларнинг вояга етмаган фарзандларига ижтимоий хизматлар кўрсатиш тизимини такомиллаштиришга қаратилган кенг кўламли ишлар амалга оширилмоқда.
Хусусан бу борада Ўзбекистон Республикасининг 2026 йил
11 сентябрдаги “Тазйиқ ва зўравонликдан жабрланган шахсларга ижтимоий хизматлар кўрсатиш тизими янада такомиллаштирилиши муносабати билан Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида”ги ЎРҚ-1175-сонли Қонуни билан бир қатор қонун ҳужжатларига қўшимча ва ўзгартиришлар киритилди.
Тазйиқ ва зўравонликдан жабрланган хотин-қизларни ҳамда уларнинг вояга етмаган фарзандларини йўқотилган биометрик паспортлар (идентификацияловчи ID-карталар) ўрнига биометрик паспортлар (идентификацияловчи ID-карталар) берганлик учун, никоҳ тузилганлиги тўғрисида ва туғилганлик ҳақида такрорий гувоҳномалар берганлик учун давлат божини тўлашдан озод этиш, «Инсон» ижтимоий хизматлар марказларига тазйиқ ва зўравонликдан жабрланган хотин-қизларнинг йўқотилган банк картасини тиклаш учун тижорат банкларига мурожаат қилиш тўғрисида нотариал тасдиқланган ишончномаларга тенглаштирилган ишончномаларини тасдиқлаш каби ҳуқуқлар берилди.
Шунингдек, Ўзбекистон Республикасининг 2023 йил 16 июнда қабул қилинган “Давлат ҳисобидан юридик ёрдам кўрсатиш тўғрисида”ги Қонунига ҳам қўшимча ва ўзгартишлар киритилиб, тазйиқ ва зўравонликдан жабрланган хотин-қизларга ҳамда уларнинг вояга етмаган фарзандларига алиментларни ундириш, болаларнинг таъминоти учун қилинадиган қўшимча харажатларни ундириш, уйга киритиш, турар жойдан фойдаланиш ҳуқуқини йўқотган деб топиш ва кўчириш, оталикни белгилаш ёки оталик ҳуқуқидан маҳрум қилиш, боланинг яшаш жойини белгилаш, бола билан кўришиш тартибини белгилаш, никоҳдан ажратиш ҳақидаги, мол-мулкни бўлиш, мол-мулкни бошқа шахснинг қонунга хилоф эгалигидан талаб қилиб олиш, мол-мулкка етказилган зарарнинг ўрнини қоплаш, ишга тиклаш, иш ҳақини ундириш тўғрисидаги ишлар бўйича давлат ҳисобидан юридик ёрдам кўрсатилиши белгиланди.
Ушбу Қонуннинг қабул қилиниши тазйиқ ва зўравонликдан жабрланган хотин-қизлар ва уларнинг вояга етмаган фарзандларининг ҳуқуқ ва эркинларини тўлиқ амалга оширишга, судларга мурожаат қилишда ҳуқуқий ёрдам кўрсатилишини кафолатлайди.
Фуқаролик ишлари бўйича
Сариосиё туманлараро суди судьяси Б.Х.Джураев