«Коррупцияга қарши кураш – умуммиллий вазифадир. Шу боис ҳеч биримиз бу вазифада четдан қараб турмасдан, коррупцияга нисбатан муросасиз бўлишимиз, бир ёқадан бош чиқаришимиз лозим»
2025-12-23 14:30:00 / Янгиликлар
Маълумотларга кўра, бу иллатдан жаҳон иқтисодиёти йилига 3 триллион доллар зарар кўраётгани барчамизни ҳушёрликка ундайди. Жорий йил март ойида Президентимиз раислигида коррупциянинг олдини олиш бўйича ишлар натижадорлиги ва келгусидаги устувор вазифаларга бағишланган кенгайтирилган йиғилишда айни масалага чуқурроқ тўхталиб ўтилди.
Айтиш керакки, сўнги вақтларда мамлакатимизнинг очиқлик бўйича халқаро рейтинглардаги ўрни 138 поғонага яхшиланиб, Марказий Осиёда биринчи, дунёда 30-ўринга кўтарилди ва Ўзбекистон бундан кейин ҳам очиқлик сиёсатини, сўз эркинлиги ғояларини ҳаётга татбиқ этишда қатъий давом этишини давлатимиз раҳбари алоҳида таъкидлади.
Бугун мамлакатимизда коррупцияни таг-томири билан қуритиш учун аввало инсон омили ва қоғозбозликни камайтиришга алоҳида эътибор қаратилмоқда.
Ушбу йиғилишда Кадрларда фидойилик, иллатларга қарши курашишда ҳамжиҳатлик етишмаётгани бу борадаги энг катта камчилик сифатида кўрсатиб ўтилди. Мамлакатимиздаги тинчлик ва барқарорликни қадрлаш, кечаги кун билан бугунги кунни фарқини яхши тушуниш, маҳаллада, тўй-маракада ортиқча исрофгарчиликка йўл қўймаслик, ҳалоллик ва шукроналик билан ҳаёт кечиришни тушунтириш ишлари бўйича жамиятимизда яхши тажрибалар етишмаслиги қайд этилди.
Бу каби камчиликларни бартараф этиш учун Қарши туманида ҳам барча зарур чоралар кўриб борилмоқда. Коррупцияни олдини олиш – давлат хизматига профессионал ва фидойи кадрларни танлаш ҳамда уларни “ҳалоллик вакцинаси” билан эмлаш каби тадбирларга алоҳида эътибор қаратилмоқда. Лавозимга қўйишда ходимнинг қайси олийгоҳни битиргани ёки қаерда ишлагани эмас, қандай билим-тажрибага эгалиги ва кўрсатган натижалари асосий мезон бўлмоқда. Бу борада номзоднинг камчиликлари билан бирга яхши тарафларини ҳам холисона айтиш керак.
Коррупцияга қарши кураш – умуммиллий вазифадир. Шу боис ҳеч биримиз бу вазифада четдан қараб турмасдан, коррупцияга нисбатан муросасиз бўлишимиз, бир ёқадан бош чиқаришимиз лозим. Муҳими, бутун жамоатчилик вакиллари бирлашиб, бу иллатга “жамият танасидаги саратон” сифатида қарасак, албатта натижаларимиз ҳам шунга яраша бўлади.
З.Аликулов.