«Аёллар дафтари»га киритилган хотин-қизларга ҳуқуқий ёрдам

«Аёллар дафтари»га киритилган хотин-қизларга сайёр қабуллар орқали қуйидагилар бўйича ҳуқуқий ёрдам кўрсатилади:

• прокуратура органлари — ҳуқуқлари ва қонуний манфаатлари бузилган хотин-қизларга амалий ёрдам кўрсатиш, судга мурожаат қилиш тартибини тушунтириш, судга мурожаат қилиш учун зарур бўлган ҳужжатларни расмийлаштиришга кўмаклашиш;

• ички ишлар органлари — тазйиқ ва зўравонликдан жабрланган хотин-қизларни ушбу таҳдидлардан ҳимоя қилиш, такрорий зўравонлик содир этилишининг олдини олиш мақсадида профилактик суҳбат ўтказиш ва зўравонлик содир этган шахсни тузатиш дастуридан ўтиш бўйича ваколатли органга юбориш, ҳимоя ордери талабларининг ижросини назорат қилиш ҳамда унинг талабларини бузиб зўравонлик содир этган шахсларни жавобгарликка тортиш юзасидан ўз ваколати доирасида чора кўриш;

• адлия органлари — ҳуқуқий маслаҳатлар бериш.

«Аёллар дафтари»га киритилган хотин-қизларга психологик ёрдам

«Аёллар дафтари»га киритилган хотин-қизларга қуйидаги ташкилотлар томонидан психологик ёрдам ва маслаҳатлар бериб борилади:

• «Аёллар маслаҳат кенгаши»;

• Аёлларни реабилитация қилиш ва мослаштириш республика маркази, унинг ҳудудий ва туманлараро намунавий марказлари;

• Аҳоли бандлигига кўмаклашиш маркази ҳузуридаги «Хотин-қизлар ҳуқуқий, психологик маслаҳатхонаси»;

• таълим муассасаларида фаолият юритаётган малакали психологлар.

Норматив ҳужжатлар

Ўзбекистон Республикаси Вазирлар Маҳкамасининг қарори, 2022 йил 31 мартдаги 145-сон.