2026 йил 3 март куни Ўзбекистон Республикаси Президенти Шавкат Мирзиёев томонидан қабул қилинган ПФ-33-сонли фармон мамлакатимизда аёллар ва болалар ҳуқуқларини ҳимоя қилиш, оилавий зўравонлик ва тазйиқ ҳолатларининг олдини олиш, шунингдек ёш оилаларни қўллаб-қувватлашга қаратилган муҳим ҳуқуқий ҳужжатлардан биридир.

Фармоннинг асосий мақсади жамиятда соғлом ижтимоий муҳитни шакллантириш, оилавий қадриятларни мустаҳкамлаш ва фуқароларнинг ҳуқуқий ҳимоясини кучайтиришдан иборат. Шу билан бирга, ҳужжат ёшларнинг эрта никоҳга киришининг олдини олиш, талаба қизларга таълим олишда қўшимча имкониятлар яратиш каби масалаларга ҳам алоҳида эътибор қаратади.

ПФ-33-сон фармон доирасида аёллар ҳуқуқларини ҳимоя қилиш тизими янада такомиллаштирилади. Уларнинг жамиятдаги ўрни ва роли мустаҳкамланиб, иқтисодий ва ижтимоий жиҳатдан қўллаб-қувватлаш чоралари кенгайтирилади. Шунингдек, аёлларга психологик ва ҳуқуқий ёрдам кўрсатиш тизимини ривожлантириш, зўравонлик ва тазйиқ ҳолатларининг олдини олишга қаратилган чора-тадбирлар амалга оширилади.

Болалар ҳуқуқларини ҳимоя қилиш ҳам фармоннинг устувор вазифаларидан бири ҳисобланади. Фарзандларнинг хавфсизлиги, соғлом ривожланиши ва барқарор муҳитда тарбияланиши учун махсус чора-тадбирлар белгиланган. Бу борада давлат органлари, таълим муассасалари ва жамоатчилик ташкилотлари ўртасидаги ҳамкорлик янада мустаҳкамланади.

Эрта никоҳларнинг олдини олиш масаласи ҳам алоҳида эътибор марказида. Эрта никоҳлар ёшларнинг таълим олиш имкониятларини чеклайди ва уларнинг соғлиғига салбий таъсир кўрсатиши мумкин. Шу боис, фармон орқали вояга етмаган шахсларни турмушга мажбур қилиш ҳолатларига нисбатан жавобгарлик кучайтирилади.

Фармонда ёш оилаларни қўллаб-қувватлашга ҳам катта аҳамият берилган. Хусусан, никоҳ шартномаси тузган оилаларга муайян имтиёзлар тақдим этиш, ёш оилаларни моддий ва ижтимоий жиҳатдан қўллаб-қувватлаш чоралари назарда тутилган. Бу эса оилавий барқарорликни мустаҳкамлаш, турли низоларнинг олдини олиш ва келажак авлодлар учун соғлом муҳит яратишга хизмат қилади.

Шунингдек, талаба қизлар учун ҳам қўшимча имкониятлар яратилмоқда. Ҳомиладор ёки фарзанди бор талаба қизлар таълимни давом эттириши учун шароитлар яратилади. Бу эса аёлларнинг таълим олиш ҳуқуқини таъминлаш, уларнинг жамиятдаги фаоллигини оширишга хизмат қилади.

Фармоннинг энг муҳим натижаларидан бири — жамиятда соғлом ижтимоий муҳитни шакллантириш ва ҳуқуқий маданиятни юксалтиришдир. Фуқаролар ўз ҳуқуқ ва мажбуриятларини яхши билган тақдирда, ҳуқуқбузарликлар камаяди, оилаларда тинчлик ва ўзаро ҳурмат муҳити мустаҳкамланади.

ПФ-33-сонли Президент фармони амалга оширилиши натижасида:

• аёллар ва болаларнинг ҳуқуқлари ишончли ҳимоя қилинади;

• оилавий зўравонлик ҳолатларининг олди олинади;

• ёш оилалар давлат томонидан кенг кўламли қўллаб-қувватланади;

• жамиятда ҳуқуқий маданият янада юксалади.

Мазкур фармон бугунги кун ва келажак авлодлар учун ижтимоий адолатни таъминлашга хизмат қиладиган муҳим қадам ҳисобланади.