Ўзбекистон Республикаси давлат мустақиллигининг 35 йиллиги муносабати билан Оҳангарон тумани ҳокими Баҳром Норқобиловнинг БАЙРАМ ТАБРИГИ
2026-08-31 11:00:00 / Раҳбариятнинг баёнотлари ва нутқлари
Азиз ва муҳтарам Оҳангарон тумани аҳли!
Қадрли юртдошлар!
Барчангизни Ўзбекистон Республикаси давлат мустақиллигининг 35 йиллиги муносабати билан чин қалбимдан самимий муборакбод этаман!
Мустақиллик — халқимиз учун энг улуғ ва энг азиз неъмат, миллий ўзлигимиз, эркин ва фаровон ҳаётимиз, тинч ва осойишта келажагимизнинг мустаҳкам пойдеворидир.
Мустақилликнинг мазмун-моҳияти, аввало, инсоннинг қадр-қиммати, ҳуқуқ ва эркинликлари таъминланган, ҳар бир фуқаро ўз орзу-интилишларини рўёбга чиқариши учун муносиб шароит яратилган жамият барпо этишда намоён бўлади. Бугун юртимизда амалга оширилаётган кенг кўламли, халқчил ислоҳотларнинг бош мақсади ҳам айнан инсон қадрини улуғлаш, халқнинг розилиги ва фаровон ҳаётини таъминлашга қаратилган.
Янги Ўзбекистонда ҳар бир ҳудуднинг, ҳар бир маҳалланинг қиёфаси ўзгариб, одамларнинг ҳаёт сифати яхшиланиб бормоқда. Таълим, тиббиёт, тадбиркорлик, бандлик, уй-жой, муҳандислик-коммуникация тармоқлари ва ижтимоий инфратузилмани ривожлантириш борасидаги ишлар халқимиз эҳтиёж ва талабларига яқинлашмоқда.
Бу эзгу жараёнлар Оҳангарон тумани ҳаётида ҳам яққол намоён бўлмоқда. Туманимизда маҳаллаларни ободонлаштириш, йўл ва ички инфратузилмани яхшилаш, аҳолини тоза ичимлик суви, электр энергияси ва бошқа зарур хизматлар билан таъминлаш, замонавий таълим ва тиббий хизмат кўрсатиш учун шароит яратиш борасида изчил ишлар олиб борилмоқда.
Айниқса, маҳаллаларда аҳоли билан очиқ мулоқот қилиш, одамларни қийнаётган муаммоларни ўрганиш ва уларга амалий ечим топишга алоҳида эътибор қаратилмоқда. Чунки халқ билан мулоқот, одамларнинг дарди ва ташвишини эшитиш, уларнинг таклиф ва ташаббусларини қўллаб-қувватлаш — бугунги бошқарувнинг энг муҳим мезонларидан биридир.
Туманимизда янги иш ўринлари яратиш, инвестисияларни жалб этиш, тадбиркорликни ривожлантириш, қишлоқ хўжалигида замонавий лойиҳаларни амалга ошириш, ёшлар ва хотин-қизларни қўллаб-қувватлаш борасида ҳам салмоқли ишлар амалга оширилмоқда. Бу эса юртдошларимизнинг эртанги кунга бўлган ишончини янада мустаҳкамлашга хизмат қилмоқда.
Албатта, эришилаётган ҳар бир натижанинг замирида туманимиз аҳлининг фидокорона меҳнати, ташаббуси ва Ватан тараққиётига қўшаётган муносиб ҳиссаси мужассам. Бугунги обод маҳаллалар, янги корхоналар, замонавий ижтимоий объектлар ва яратилаётган қулай шароитлар — биргаликдаги меҳнатимиз самарасидир.
Азиз тумандошлар!
Мустақиллик байрами — нафақат шодиёна, балки Ватан олдидаги масъулиятимизни яна бир бор ҳис этиш куни ҳамдир. Биз Янги Ўзбекистонни барпо этишдек улуғ мақсад йўлида бир тану бир жон бўлиб ҳаракат қилсак, олдимизга қўйган юксак марраларга албатта эришамиз.
Фарзандларимиз биздан тинч ва обод юрт, муносиб таълим ва тарбия, мустаҳкам келажак кутади. Шу боис ёш авлодга сифатли таълим бериш, уларнинг истеъдод ва қобилиятини рўёбга чиқариш, спорт ва маданият билан шуғулланиши учун зарур имкониятларни яратиш барчамизнинг устувор вазифамиз бўлиб қолади.
Бугунги улуғ айёмда барчангизга мустаҳкам соғлик, оилавий бахт ва хотиржамлик, хонадонларингизга файзу барака тилайман. Юртимиз тинч, осмонимиз мусаффо, дастурхонимиз тўкин, ишларимиз баракали бўлсин!
Янги Ўзбекистон тараққиёти йўлидаги эзгу ишларимиз бардавом бўлсин!
Мустақиллигимиз абадий, Ватанимиз тинч ва халқимиз ҳамиша фаровон бўлсин!
Ўзбекистон Республикаси давлат мустақиллигининг 35 йиллиги муборак бўлсин!
Ҳурмат билан,
Оҳангарон тумани ҳокими
Баҳром Норқобилов.