Фуқаролар мурожаатлари билан ишлаш масъуллари иштирокида муҳокама йиғилиши ўтказилди
2026-09-04 11:05:00 / Янгиликлар
Оҳангарон туманида аҳоли мурожаатларини ўз вақтида кўриб чиқиш, уларда кўтарилган масалаларни чуқур ўрганиш ва мурожаатларнинг амалий ечимини таъминлаш борасидаги ишларга алоҳида эътибор қаратилмоқда.
Шу мақсадда туман Халқ қабулхонаси мудири ўринбосари Маъруф Тошбоев раҳбарлигида туман ташкилотларида мурожаатлар билан ишлашга масъул ходимлар иштирокида муҳокама йиғилиши бўлиб ўтди.
Йиғилишда ташкилотларда мурожаатлар билан ишлаш тизимининг бугунги ҳолати атрофлича таҳлил қилиниб, фуқаролардан келиб тушаётган мурожаатларни қабул қилиш, уларни белгиланган тартибда кўриб чиқиш, масъул ижрочиларга йўналтириш ҳамда якуний натижаси бўйича фуқарога асосли маълумот бериш жараёнларига эътибор қаратилди.
Мулоқот давомида мурожаатлар билан ишлашда йўл қўйилаётган айрим камчиликлар танқидий-таҳлилий руҳда муҳокама қилинди. Хусусан, мурожаатларда кўтарилган масалаларни чуқур ўрганмаслик, айрим ҳолатларда муаммонинг мазмун-моҳиятидан келиб чиқмаган ҳолда юзаки жавоблар бериш, мурожаатларни кўриб чиқиш муддатларига эътибор қаратмаслик каби ҳолатларнинг олдини олиш зарурлиги таъкидланди.
Қайд этилганидек, ҳар бир мурожаат ортида инсоннинг муайян муаммоси, эҳтиёжи ёки қонуний талаби турганини инобатга олган ҳолда, масъул ходимлар мурожаатларга расмиятчилик нуқтаи назаридан эмас, балки инсон қадри, унинг манфаати ва муаммонинг амалий ечими нуқтаи назаридан ёндашиши лозим.
Йиғилишда мурожаатлар билан ишлаш самарадорлигини ошириш, масъул ходимларнинг бу борадаги билим ва кўникмаларини янада мустаҳкамлаш, ҳар бир мурожаатни назоратга олиш ва унинг натижадорлигини таъминлаш юзасидан тегишли тавсиялар берилди.
Масъулларга аҳоли билан мулоқот маданиятига қатъий риоя қилиш, мурожаатларни белгиланган муддатларда сифатли кўриб чиқиш, фуқароларнинг қонуний талабларини эътиборсиз қолдирмаслик ҳамда мурожаатлар такрорий тус олишининг олдини олиш бўйича аниқ вазифалар белгилаб берилди.
Зеро, фуқаро мурожаатининг ижобий ҳал этилиши — инсоннинг давлат идораларига бўлган ишончини мустаҳкамлайди. Шу боис мурожаатлар билан ишлашга масъул ҳар бир ходим ўз вазифасига юксак масъулият билан ёндашиши, ҳар бир мурожаатни инсон тақдири билан боғлиқ муҳим масала сифатида қабул қилиши зарур.