Ўзбекистон Республикаси давлат мустақиллигининг 35 йиллиги муносабати билан Оҳангарон тумани ҳокими Баҳром Норқобиловнинг байрам тадбиридаги нутқи
2026-08-23 21:10:00 / Раҳбариятнинг баёнотлари ва нутқлари
Ассалому алайкум, қадрли юртдошлар, азиз тумандошлар, муҳтарам меҳмонлар!
Аввало, барчангизни халқимиз учун энг улуғ, энг азиз ва энг қадрли байрам — Ўзбекистон Республикаси давлат мустақиллигининг 35 йиллиги билан чин қалбимдан самимий муборакбод этаман!
Барчангизга мустаҳкам соғлик, оилавий хотиржамлик, файзу барака, бахт ва омад тилайман.
Мустақиллик бу – шунчаки бир сана ёки байрам эмас.
Мустақиллик бу – халқнинг ўз тақдирини ўзи белгилаш ҳуқуқи.
Мустақиллик бу – миллий қадриятларимиз, тилимиз, динимиз, урф-одат ва анъаналаримизни асраб-авайлаш, уларни келгуси авлодларга етказиш имконияти.
Мустақиллик бу – фарзандларимиз келажагига ишонч билан қараш, юртимизнинг эртанги кунини ўз қўлимиз билан барпо этиш масъулиятидир.
Шу маънода, 35 йиллик тарихимизга назар ташлар эканмиз, бу давр халқимиз ҳаётида туб бурилишлар, улкан ўзгаришлар ва юксалишлар даври бўлганини кўрамиз.
Бугун Ўзбекистон жаҳон ҳамжамиятида ўзининг муносиб ўрнига эга бўлган, улкан иқтисодий ва инсон салоҳиятига эга, тараққиёт сари дадил одимлаётган давлат сифатида эътироф этилмоқда.
Айниқса, сўнгги йилларда Муҳтарам Президентимиз Шавкат Миромонович Мирзиёев раҳнамолигида мамлакатимизда инсон қадрини юксалтириш, аҳоли фаровонлигини ошириш, тадбиркорликни қўллаб-қувватлаш, янги иш ўринлари яратиш, таълим ва тиббиёт сифатини ошириш, ҳудудлар инфратузилмасини яхшилашга қаратилган кенг кўламли ислоҳотлар ҳаётимизда ўзининг амалий натижаларини намоён этмоқда.
Бугунги байрам шу юксалишлар ҳақида гапириш, эришган натижаларимизни сарҳисоб қилиш билан бирга, олдимизда турган вазифаларни белгилаб олиш учун ҳам муҳим фурсатдир.
Азиз тумандошлар!
Оҳангарон тумани ҳам мустақиллик йилларида катта тараққиёт йўлини босиб ўтди. Туманимиз бугун саноат, қишлоқ хўжалиги, тадбиркорлик, инвестиция, ижтимоий соҳалар ва туризм борасида ўз салоҳиятини тобора кенг намоён этаётган ҳудудлардан бирига айланиб бормоқда.
Рақамларга мурожаат қиладиган бўлсак, сўнгги ўн йил давомида Оҳангарон тумани иқтисодиётидаги ўзгаришлар кўлами ниҳоятда катта бўлганини кўрамиз.
Хусусан, саноат маҳсулотлари ишлаб чиқариш ҳажми 8 баробарга ўсиб, 1,2 триллион сўмдан 9,8 триллион сўмга етди. Ҳудудда 345 та янги саноат корхонаси ташкил этилди. Бу – янги иш ўринлари, янги имкониятлар, оилалар даромадининг ортиши ва туман иқтисодий салоҳиятининг юксалиши деганидир. Кичик бизнес ва хусусий тадбиркорликни қўллаб-қувватлаш борасидаги ислоҳотлар натижасида тадбиркорлик субъектлари сони 273 тадан 1132 тага етди.
Бу рақамлар ортида ўз бизнесини бошлаган, оиласи фаровонлигини таъминлаётган, янги иш ўринлари яратаётган минглаб инсонларнинг меҳнати ва ташаббуси мужассам.
Шунинг учун ҳам бугунги байрамда туманимиз тадбиркорларига, ишбилармон ва ташаббускор инсонларига алоҳида миннатдорлик билдирмоқчиман.
Сизларнинг жасоратингиз, янгиликка интилишингиз ва меҳнатингиз Оҳангароннинг иқтисодий қудратини оширишда муҳим аҳамият касб этмоқда.
Ҳурматли юртдошлар!
Оҳангарон туманида инвестиция йўналишида ҳам катта натижаларга эришилди. Кейинги йилларда туман иқтисодиётига 2,9 миллиард АҚШ доллари миқдорида хорижий инвестициялар жалб қилиниб, 55 та инвестицион лойиҳа амалга оширилди.
Натижада замонавий ишлаб чиқариш корхоналари ишга туширилиб, 6115 та янги иш ўрни яратилди.
Бу рақамлар туманимизга инвесторларнинг қизиқиши ортиб бораётганини, Оҳангароннинг иқтисодий ва инвестицион салоҳияти тобора юксалаётганини кўрсатади.
Албатта, биз бу натижалар билан чекланиб қолмаслигимиз керак.
Олдимиздаги энг муҳим вазифалардан бири — янги инвестицияларни жалб этиш, замонавий ишлаб чиқаришларни йўлга қўйиш, янги иш ўринлари яратиш ва аҳоли даромадларини янада оширишдан иборат.
Қадрли тумандошлар!
Оҳангарон — қишлоқ хўжалиги учун ҳам катта имкониятларга эга ҳудуд. Сўнгги йилларда соҳада замонавий агротехнологияларни жорий этиш, ерларнинг унумдорлигини ошириш, интенсив боғ ва токзорлар барпо этиш борасида салмоқли ишлар амалга оширилди. Сўнгги ўн йилда 1232 гектар интенсив боғлар ва 1361 гектар токзорлар ташкил этилди. Бу ерлар бугун нафақат қишлоқ хўжалиги маҳсулотлари етиштириш манбаи, балки минглаб аҳоли учун даромад ва бандлик имкониятидир.
Чорвачилик соҳасида ҳам кўрсаткичларимиз салмоқли. Туманда қорамоллар сони 21 500 бошдан 80 219 бошга, майда шохли моллар сони 181 000 бошдан 286 032 бошга етди. Йил якунига қадар чет элдан яна 30 минг бош наслдор чорва молларини олиб келиш режалаштирилган.
Гўшт ишлаб чиқариш ҳажми 7,2 минг тоннадан 21 минг тоннага, сут ишлаб чиқариш 48 минг тоннадан 69 минг тоннага, тухум етиштириш эса 86,6 миллион донадан 106,6 миллион донага ошди.
Бу натижаларни биз, аввало, қишлоқ меҳнаткашларининг машаққатли ва ҳалол меҳнати натижаси сифатида баҳолаймиз.
Шу муносабат билан фермер ва деҳқонларимизга, чорвадорларимизга, кластер ва хўжаликлар раҳбарларига, умуман, ерга меҳр билан меҳнат қилаётган барча инсонларга самимий ташаккур билдираман.
Азизлар!
Халқ фаровонлиги ҳақида гапирганда, аввало, инсоннинг кундалик ҳаётига бевосита таъсир қиладиган шароитлар ҳақида ўйлашимиз керак.
Шу боис, кейинги йилларда туманимизда муҳандислик-коммуникация ва коммунал инфратузилмани яхшилашга алоҳида эътибор қаратилди.
Бунинг натижасида аҳолининг ичимлик суви билан таъминланиш даражаси 32 фоиздан 70 фоизга етказилди. 210 километр ичимлик суви тармоқлари, 31 километр электр тармоқлари ҳамда 17,2 километр газ қувурлари қурилди ва реконструкция қилинди. 157 километр ички йўллар таъмирланди. «Ташаббусли бюджет» лойиҳаси доирасида эса жами 72 та лойиҳага 89,3 миллиард сўм маблағ йўналтирилди.
Буларнинг барчаси одамларнинг кундалик ҳаётини енгиллаштириш, маҳаллаларни обод қилиш ва аҳоли учун муносиб шароит яратишга қаратилган.
Шу билан бирга, биз бу борадаги ишларни ҳали якунланган, деб ҳисобламаймиз. Чунки халқимиз эҳтиёжи, одамларнинг талаб ва истаклари биз учун энг муҳим мезондир.
Қайси маҳаллада йўл муаммоси бор — ўша ерда ишлашимиз керак.
Қайси хонадонга ичимлик суви етиб бормаётган бўлса — бу масалани ҳал этишимиз керак.
Қайси ҳудудда электр таъминоти билан боғлиқ муаммо бўлса — уни бартараф этиш зарур.
Биз учун ҳар бир маҳалла, ҳар бир кўча ва ҳар бир хонадоннинг фаровонлиги муҳим.
Азиз тумандошлар!
Мустақилликнинг энг катта бойлиги — ИНСОН.
Шунинг учун ижтимоий ҳимоя, аҳоли саломатлиги, таълим ва ёшлар масаласига алоҳида эътибор қаратиб келинмоқда. Кам таъминланган оилалар, ногиронлиги бўлган шахслар, кексалар, ёшлар ва хотин-қизларни қўллаб-қувватлаш мақсадида, «Темир дафтар», «Аёллар дафтари» ва «Ёшлар дафтари» орқали минглаб фуқароларнинг муаммолари ҳал этилди.
Бу борадаги ишларнинг моҳияти — инсонни муаммоси билан ёлғиз қолдирмаслик, уни қўллаб-қувватлаш, меҳнат қилиб, муносиб ҳаёт кечириши учун имконият яратишдир.
Шунингдек, туманимизда таълим соҳасида ҳам муҳим натижаларга эришилди. Кейинги йилларда 20 та мактаб ва 24 та давлат мактабгача таълим ташкилоти бинолари қурилди ва реконструкция қилинди. Оилавий нодавлат мактабгача таълим ташкилотлари сони 62 тага етди. Болаларнинг мактабгача таълим билан қамрови 48,3 фоиздан 79,8 фоизга ошди. Бу — фарзандларимиз келажагига киритилаётган энг муҳим сармоялардан биридир. Чунки бугун таълимга эътибор берсак, эртага билимли, салоҳиятли ва Ватан тақдирига дахлдор ёш авлодни кўрамиз.
Шу ўринда, фарзандларимизни тарбиялаётган ота-оналарга, ёш авлодга таълим ва тарбия бераётган устозларга алоҳида миннатдорчилик билдираман.
Қадрли юртдошлар!
Сўнгги йилларда туманимизда аҳоли саломатлигини муҳофаза қилиш борасида ҳам салмоқли ишлар амалга оширилди. 17 та тиббиёт муассасаси қурилди ва капитал таъмирланди. Замонавий тиббий жиҳозлар билан таъминлаш учун 34 миллиард сўм маблағ йўналтирилди. Бугун аҳолига тиббий хизмат кўрсатиш имкониятлари кенгайиб, замонавий тиббий ускуналардан фойдаланиш кўлами ортмоқда.
Албатта, тиббиётда бино ва жиҳознинг ўзи етарли эмас. Энг асосийси — беморга меҳр, эътибор ва масъулият билан муносабатда бўлиш.
Шунинг учун соғлиқни сақлаш тизимида меҳнат қилаётган барча шифокор ва тиббиёт ходимларига ўз номимдан ҳамда туман аҳолиси номидан миннатдорлик билдираман.
Ҳурматли меҳмонлар, азиз тумандошлар!
Оҳангарон туманининг имкониятлари фақат саноат ёки қишлоқ хўжалиги билан чекланмайди.
Туманимизнинг бой тарихи, маданий мероси ва бетакрор табиати туризмни ривожлантириш учун катта имконият беради.
Сўнгги йилларда туристлар оқими 9,3 баробарга ошгани ҳам бу салоҳиятдан самарали фойдаланиш имкониятлари кенг эканини кўрсатмоқда.
Янги меҳмонхоналар, дам олиш масканлари ва хизмат кўрсатиш объектларининг ташкил этилиши туманимизда хизматлар соҳасини янада ривожлантириш учун муҳим қадам бўлмоқда.
Биз келгусида ҳам Оҳангароннинг тарихий ва табиий имкониятларини кенг тарғиб этиш, сайёҳлар учун қулай шароитлар яратиш, хизмат кўрсатиш сифатини ошириш борасида ишларни давом эттирамиз.
Азиз юртдошлар!
Бугун биз эришилган натижаларни санар эканмиз, бир ҳақиқатни чуқур англаймиз – бу ютуқларнинг барчаси, аввало, халқимизнинг меҳнати ва ишончи билан яратилган.
Маҳалла раиси ва фаолидан тортиб, оддий ишчигача, фермеру тадбиркордан тортиб, ўқитувчи ва шифокоргача — ҳар бир инсоннинг меҳнати бугунги Оҳангарон қиёфасида ўз аксини топган.
Шунинг учун бугунги байрамда барча тумандошларимизга самимий миннатдорлик билдираман.
Айниқса, ҳаётнинг турли синовларини елкасида кўтариб, юртимиз тараққиётига ўз ҳиссасини қўшган муҳтарам нуронийларимизга алоҳида эҳтиромимизни изҳор этаман.
Сизларнинг ҳаётий тажрибангиз, дуоларингиз, фарзандлар ва ёшларга бераётган ўгитларингиз биз учун катта маънавий таянчдир.
Шу ўринда, ёшларимизга ҳам мурожаат қилмоқчиман.
Азиз ёшлар!
Бугун юртимизда сизлар учун кенг имкониятлар ва муносиб шароитлар яратилмоқда. Президентимиз раҳбарлигида ёшларни қўллаб-қувватлаш, уларнинг билим олиши, замонавий касб-ҳунарларни эгаллаши, ўз иқтидори ва салоҳиятини намоён этиши учун янги имкониятлар эшиги очилмоқда.
Билим олиш, сифатли таълимга эга бўлиш, касб-ҳунар ўрганиш, тадбиркорлик билан шуғулланиш, хорижий тилларни ўзлаштириш, замонавий ахборот технологияларини эгаллаш, стартап ва инновацион лойиҳаларни амалга ошириш учун зарур шароитлар яратилмоқда. Ёшларнинг бандлигини таъминлаш, уларни тадбиркорликка жалб этиш, имтиёзли кредит ва субсидиялар орқали қўллаб-қувватлашга алоҳида эътибор қаратилмоқда.
Энг муҳими, бугунги Ўзбекистонда ёшлар ўз ғояси, ташаббуси ва иқтидори билан катта мақсадлар сари интилиши учун имконият бор. Президентимиз таъкидлаётганидек, ёшларга ишонч билдириш, уларнинг орзу-интилишларини қўллаб-қувватлаш — Янги Ўзбекистон тараққиётининг муҳим омилларидан биридир.
Шунинг учун, азиз ёшлар, ўз олдингизга катта ва эзгу мақсадлар қўйинг. Вақтингизни қадрланг, билим олишдан, изланишдан ва янги нарсаларни ўрганишдан тўхтаманг. Бугун эгаллаган билим ва кўникмангиз эртанги ҳаётингиз, оилангиз ва жамиятимиз тараққиёти учун мустаҳкам пойдевор бўлади.
Сизларнинг ҳар бир ютуғингиз — аввало, ўзингизнинг муваффақиятингиз, шу билан бирга, Оҳангароннинг, Тошкент вилоятининг ва бутун Ўзбекистоннинг ютуғидир.
Қадрли тумандошлар!
Мустақиллик бизга улкан имкониятлар билан бирга катта масъулият ҳам юклади.
Энди олдимиздаги вазифа — эришилган натижаларни янада мустаҳкамлаш, туманимизни ҳар томонлама ривожлантириш, аҳоли турмуш даражасини ошириш ва Оҳангаронни янада обод ҳудудга айлантиришдир.
Биз ҳар бир маҳаллада иш ўринлари кўпайиши, оилалар даромади ошиши, тадбиркорлик ривожланиши, замонавий ишлаб чиқаришлар ташкил этилиши учун ҳаракат қиламиз.
Жумладан, жорий йил якунига қадар саноат маҳсулотлари ишлаб чиқариш ҳажми 11 668,3 млрд. сўмга етказилиб, ўсиш суръатини 105,2 фоизга, бозор хизматлари кўрсатиш 1 012,6 млрд. сўмга етказилиб, ўсиш суръати 116,7 фоизга, қишлоқ, ўрмон ва балиқчилик хўжалиги маҳсулотлари етиштириш ҳажми 2 737,7 млрд. сўмга етказилиб, ўсиш суръати 106,7 фоизга, қурилиш ишлари ҳажми 1 096,5 млрд. сўмга етказилиб, ўсиш суръатини 115,1 фоиз етказиш мақсад қилиб олинган.
Йўллар, ичимлик суви, электр энергияси, ободонлаштириш, таълим, тиббиёт ва бошқа соҳалардаги мавжуд масалаларни ҳал этишда аҳоли билан бирга ишлаймиз. Чунки биз учун бош мезон — натижа. Одамларнинг ҳаётидаги ижобий ўзгариш — энг катта натижа. Фуқаронинг розилиги эса — энг катта баҳo. Оиладаги хотиржамлик ва фарзандларнинг бахтли келажаги — энг олий мақсадимиздир.
Биз бу йўлда халқ билан бирга, маҳалла билан бирга, нуронийларимиз дуоси ва ёшларимиз ғайратига таяниб ҳаракат қиламиз.
Қадрли тумандошлар!
Бугунги шодиёнада яна бир бор мустақиллигимизнинг нақадар буюк неъмат эканини ҳис этяпмиз. Биз тинч ва осмони мусаффо юртда, фарзандларимиз бағрида, оиламиз даврасида байрам қилаётганимиз учун шукроналар айтамиз.
Бу тинчликни асраш, унинг қадрига етиш, юртимиз тараққиётига муносиб ҳисса қўшиш — барчамизнинг муқаддас бурчимиз.
Мустақиллигимиз абадий бўлсин!
Юртимиз осмони доимо мусаффо бўлсин!
Халқимиз тинч ва фаровон ҳаёт кечирсин!
Оилаларимиздан файзу барака, хонадонларимиздан кулгу ва шодлик аримасин!
Фарзандларимиз соғлом, билимли, бахтли ва Ватанга муносиб инсонлар бўлиб камол топсин!
Оҳангарон тумани янада обод ва фаровон ҳудудга айлансин!
Барчангизни Ўзбекистон Республикаси давлат мустақиллигининг 35 йиллиги билан яна бир бор чин қалбимдан муборакбод этаман!
Муҳтарам Юртбошимиз асос солган Янги Ўзбекистон тараққиёти йўлида халқимизга куч-қувват, хонадонларимизга тинчлик-хотиржамлик ва юртимизга равнақ тилайман!
Байрамингиз муборак бўлсин, азиз тумандошлар!
Баҳром НОРҚОБИЛОВ,
Оҳангарон тумани ҳокими.