Тошкент вилояти Оҳангарон тумани ҳокимлиги

Ассалому алайкум, азиз ёшлар, муҳтарам устозлар, қадрли  ота-оналар, ҳурматли меҳмонлар!

Аввало, сизларни мамлакатимиз ҳаётидаги энг қувончли байрамлардан бири – 30 июнь – Ёшлар куни билан чин қалбимдан самимий муборакбод этаман.

Барчангизга мустаҳкам соғлиқ, юксак марралар, эзгу орзу-интилишларингиз рўёби ҳамда Ватанимиз тараққиёти йўлидаги фаолиятингизда улкан муваффақиятлар тилайман.

Азиз ёшлар!

Бугунги Янги Ўзбекистон тараққиётининг энг ишончли таянчи, эртанги кунимизнинг ҳал қилувчи кучи айнан сизларсиз. Мамлакатимизда ёшларга оид давлат сиёсати устувор йўналиш сифатида белгилангани, ҳар бир соҳада сизларнинг билим олишингиз, касб-ҳунар эгаллашингиз, ўз иқтидорингизни намоён этишингиз ва муносиб ҳаёт кечиришингиз учун кенг имкониятлар яратилаётгани бунинг яққол исботидир.

Бугун давлатимиз раҳбарининг ташаббуси билан ёшларни қўллаб-қувватлаш мутлақо янги босқичга кўтарилди. Замонавий мактаблар ва олий таълим муассасалари барпо этилмоқда, халқаро таълим дастурлари кенгаймоқда. "Ёшлар дафтари", "Ёшлар баланси", "Ёшлар тадбиркорлигини ривожлантириш" дастурлари орқали минглаб йигит-қизларнинг ташаббуслари рўёбга чиқмоқда.

Ёшларнинг стартап лойиҳалари, инновацион ғоялари, тадбиркорлик фаолияти давлат томонидан молиявий ва ташкилий жиҳатдан қўллаб-қувватланмоқда. Илм-фан, спорт, маданият, ахборот технологиялари, саноат, қишлоқ хўжалиги ва бошқа кўплаб соҳаларда ёшлар учун янги имкониятлар эшиги кенг очилмоқда.

Ҳурматли тадбир иштирокчилари!

Биз учун энг катта ифтихор шундаки, Оҳангарон туманининг ёшлари ҳам мамлакатимизда кечаётган бу улкан ислоҳотларнинг фаол иштирокчилари сифатида юксак натижаларни қўлга киритмоқдалар.

Илм-фан соҳасида ўзининг билим ва салоҳияти билан нафақат туманимиз, балки вилоятимиз ҳамда республикамиз шарафини муносиб ҳимоя қилиб, бугунги кунда турли соҳаларда фаолият кўрсатаётган ёшларимиз бор.

Жумладан, Диёрбек Раҳматуллаев, Шоира Ғанибоева, Диёра Туякова, Нодира Эсонбоева, Муслима Қаюмова, Салоҳиддин Акбаралиев, Ҳасан Муталов, Маҳлиё Қўчқорова ҳамда Дилшод Холмуродов турли республика ва халқаро танловларда илмий лойиҳаларда муносиб иштирок этиб, барчамизнинг юрагимизга ғурур бағишлаб келмоқдалар.

Зеро, илмга киритилган ҳар бир сармоя – миллат келажагига қўйилган мустаҳкам пойдевордир. Бугун билим олишга интилаётган ҳар бир йигит-қиз эртанги кунда мамлакатимиз тараққиётига муносиб ҳисса қўшадиган етук мутахассисга айланади.

Спорт соҳасида ҳам туманимиз ёшлари катта ютуқларга эришмоқда.

Беҳруз Маликов, Нозима Ҳасанова, Шамсиддин Тожибоев, Руҳшона Неъматхонова, Наргиза Камалова, Захро Турғунова, Феруза Мирсахатова, Нозима Турсунбоева, Дилсўз Имонова ҳамда Зарина Хайитбоевалар республика, Осиё ва жаҳон чемпионатларида юксак маҳорат ва матонат намоён этиб, давлатимиз байроғини юксакларга кўтариб келмоқдалар.

Уларнинг ҳар бир ғалабаси нафақат шахсий муваффақият, балки бутун Оҳангарон аҳлининг ғурури, юртимиз ёшларининг салоҳиятини намоён этувчи ёрқин намунадир.

Шуни алоҳида фахр-ифтихор билан таъкидлаш лозимки, бугун мамлакатимиз спорти тарихида унутилмас саҳифа очилди. Ўзбекистон миллий футбол терма жамоаси ўз тарихида илк бор Жаҳон чемпионатида иштирок этди. Натижалардан қатъи назар, бу нафақат футболимиз, балки бутун мамлакатимиз спорти учун улкан тарихий ютуқдир. Энг муҳими, мазкур натижа кейинги йилларда юртимизда спорт соҳасига қаратилаётган юксак эътибор, замонавий спорт инфратузилмасининг яратилиши, ёш истеъдодларни қўллаб-қувватлаш, малакали мураббийлар тайёрлаш ва спортчилар учун муносиб шарт-шароитлар яратиш борасида амалга оширилган тизимли ишлар самарасидир.

Бундан ташқари, маданият ва санъат соҳасида ҳам туманимиз ёшлари юксак иқтидорга эга эканини намоён этишмоқда.

Ботир Маҳкамбоев, Шаҳло Иброҳимова, Мубина Набижонова, Зарнигор Дўсматова, Раёҳон Шерматова, Мадина Одилова, Алибек Адҳамов, Асал Исмоилова, Шоҳнур Азаматов, Ҳадичабону Азимжонова, Абдулазиз Амиров, Шодия Нуруллаева ҳамда бошқа кўплаб ёшларимиз республика ва халқаро кўрик-танловларда муносиб иштирок этиб, миллий маданиятимиз ва санъатимизни муносиб тарғиб қилиб келмоқдалар.

Уларнинг ижоди, истеъдоди ва меҳнатсеварлиги барча ёшларга ўрнак бўлиб хизмат қилмоқда.

 

 

Азиз дўстлар!

Бугунги кунда тадбиркорлик соҳаси ҳам ёшлар учун ўзини намоён қилишнинг энг муҳим йўналишларидан бирига айланди.

Ўз бизнесини йўлга қўйиб, янги иш ўринлари яратаётган, иқтисодиётимиз ривожига муносиб ҳисса қўшаётган ёш тадбиркорларимиз ҳам алоҳида эътирофга муносиб.

Жумладан, Искандар Турғунбоев, Беҳзод Умирзоқов, Фарруҳбек Абдуғофуров, Шербек Тошпўлатов, Жамшид Толипов каби ёш, ташаббускор, изланувчан ва меҳнаткаш тадбиркор ёшларимиз билан ҳақли равишда фахрланамиз.

Муҳтарам тадбир қатнашчилари!

Бугунги кунда туманимизда ёшларни ҳар томонлама қўллаб-қувватлаш, уларнинг бандлигини таъминлаш, касб-ҳунарга ўқитиш, замонавий билимлар эгаллаши учун муносиб шарт-шароитлар яратиш бўйича кенг кўламли ишлар амалга оширилмоқда.

Ёшлар маркази, спорт иншоотлари, маданият муассасалари, кутубхоналар ва ахборот технологиялари марказлари фаолияти янада такомиллаштирилмоқда. Ёшларнинг ташаббусларини амалга ошириш, уларнинг иқтидорини рўёбга чиқариш учун барча имкониятлар сафарбар этилмоқда.

 

 

 

 

Азиз ёшлар!

Сизлардан кутадиган умидимиз жуда катта.

Сизлар Ватанимиз тараққиётига муносиб ҳисса қўшадиган, халқимиз ишончини оқлайдиган, юксак билимли, ватанпарвар, ҳалол ва ташаббускор инсонлар бўлиб етишишингизга ишонамиз.

Оҳангарон ёшлари ҳар доим илмда, спортда, маданиятда, тадбиркорликда ва жамият ҳаётининг барча жабҳаларида энг илғор сафларда бўлишига ишонаман.

Фурсатдан фойдаланиб, фарзандларимизни тарбиялашда улкан меҳнат қилаётган азиз ота-оналаримизга, устоз ва мураббийларимизга ҳам чуқур миннатдорлик билдираман.

Қадрли ёшлар!

Сизларни яна бир бор бугунги байрам билан самимий табриклайман.

Барчангизга мустаҳкам соғлиқ, бахт-саодат, эзгу мақсадларингиз рўёби, янги зафарлар ва улкан муваффақиятлар тилайман.

Юртимиз тинч, осмонимиз мусаффо, ёшларимизнинг орзу-интилишлари ҳамиша юксак бўлсин!

Ёшларимиз бор экан – Янги Ўзбекистоннинг келажаги янада порлоқ бўлади!

Эътиборингиз учун раҳмат!