26-июнь — Халқаро гиёҳвандликка қарши кураш куни муносабати билан Оҳангарон тумани ҳокими Баҳром Норқобиловнинг туман аҳли ва ёшларига мурожаати
2026-06-18 09:40:00 / Раҳбариятнинг баёнотлари ва нутқлари
Азиз тумандошлар!
Ҳар йили 26-июнь санаси бутун дунёда “Халқаро гиёҳвандликка қарши кураш куни” нишонланади. Ушбу сана инсон саломатлиги, миллат келажаги ва жамият барқарорлигига жиддий таҳдид солувчи гиёҳвандлик иллатига қарши курашишда барчамизни янада ҳушёр ва масъулиятли бўлишга чорлайди.
Гиёҳвандлик бу – нафақат бир инсоннинг ҳаётини издан чиқарувчи, балки оила, маҳалла ва бутун жамият тараққиётига салбий таъсир кўрсатувчи оғир ижтимоий муаммодир. Бу иллат инсоннинг соғлиғини емириб, унинг билим олиши, меҳнат қилиши ва ҳаётда ўз ўрнини топишига тўсқинлик қилади. Энг ачинарлиси, гиёҳвандлик ёшларнинг орзу-мақсадлари ва келажагини хавф остида қолдиради.
Бугунги кунда мамлакатимизда аҳолини, айниқса, ёшларни турли зарарли одатлардан асраш, уларнинг бўш вақтини мазмунли ташкил этиш, таълим, спорт ва маданиятга жалб этиш борасида кенг кўламли ишлар амалга оширилмоқда. Бу масалада давлат ташкилотлари билан бир қаторда, ҳар бир ота-она, устоз ва кенг жамоатчиликнинг масъулияти ҳам ниҳоятда муҳимдир.
Ҳурматли ота-оналар!
Фарзанд тарбиясига бефарқ бўлмаслик, уларнинг дўстлари, қизиқишлари ва кундалик машғулотларидан доимий хабардор бўлиб туриш бугун ҳар қачонгидан ҳам муҳим аҳамият касб этмоқда. Оиладаги меҳр-оқибат, самимий мулоқот ва тўғри тарбия фарзандларни ҳар қандай ёт ғоя ва зарарли иллатлардан ҳимоя қилувчи энг мустаҳкам қалқондир.
Азиз ёшлар!
Сизлар мамлакатимиз келажаги, Янги Ўзбекистоннинг ишончи ва таянчисиз. Ҳаётингизни илм-фан, спорт, касб-ҳунар ва эзгу мақсадлар билан бойитинг. Ҳеч қачон саломатлигингиз ва келажагингизни хавф остига қўядиган ҳар қандай таклиф ёки таъсирларга алданманг. Унутманг, соғлом турмуш тарзи, мустаҳкам ирода ва аниқ мақсад инсонни юксак марраларга етаклайди.
Барчамизни гиёҳвандликка қарши муросасиз муносабатда бўлишга, ёшларимизнинг соғлом ва бахтли келажаги йўлида биргаликда ҳаракат қилишга чақираман.
Юртимиз тинч, оилаларимиз фаровон, фарзандларимиз соғлом ва бахтли бўлсин!
Баҳром НОРҚОБИЛОВ, Оҳангарон тумани ҳокими.