Оҳангарон тумани ҳокими Баҳром Норқобиловнинг “Enco Group” масъулияти чекланган жамияти қўшма корхонаси очилиш маросимида сўзлаган нутқи
2026-06-03 13:05:00 / Раҳбариятнинг баёнотлари ва нутқлари
Ҳурматли меҳмонлар!
Қадрли инвесторлар ва ҳамкорлар!
Барчангизни бугунги тарихий воқеа — Оҳангарон туманида барпо этилган “Enco Group” масъулияти чекланган жамияти қўшма корхонасининг ишга туширилиш маросими билан самимий муборакбод этаман.
Бугунги тадбир нафақат янги саноат корхонасининг очилиши, балки мамлакатимиз иқтисодий тараққиёти, саноатлаштириш сиёсати ва инвестицияларни жалб қилиш борасида амалга оширилаётган кенг кўламли ислоҳотларнинг яна бир амалий натижасидир.
Сўнгги йилларда муҳтарам Президентимиз раҳнамолигида мамлакатимизда тадбиркорликни қўллаб-қувватлаш, инвесторлар учун қулай ишбилармонлик муҳитини шакллантириш, замонавий саноат ишлаб чиқаришларини ташкил этиш ҳамда ҳудудларнинг иқтисодий салоҳиятини юксалтиришга қаратилган тизимли ишлар амалга оширилмоқда.
Айниқса, хорижий ва маҳаллий инвесторлар учун солиқ ва божхона имтиёзлари, ер ажратиш, муҳандислик-коммуникация тармоқларига уланиш, молиявий қўллаб-қувватлаш ҳамда давлат хизматларини рақамлаштириш бўйича яратилган кенг имкониятлар мамлакатимизни инвестиция киритиш учун энг жозибадор ҳудудлардан бирига айлантирмоқда.
Бугунги кунда ана шу имкониятлардан самарали фойдаланиб келаётган ҳудудлардан бири, шубҳасиз, Оҳангарон туманидир.
Туманимиз географик жойлашуви, табиий ресурслари, ривожланган транспорт ва логистика инфратузилмаси, малакали меҳнат ресурслари ҳамда саноат ишлаб чиқаришини ташкил этиш учун қулай шароитлари билан инвесторларнинг диққат марказида бўлиб келмоқда.
Сўнгги йилларда Оҳангарон туманида саноат соҳаси мутлақо янги босқичга кўтарилди. Янги ишлаб чиқариш қувватлари ташкил этилмоқда, экспортбоп ва импорт ўрнини босувчи маҳсулотлар ишлаб чиқариш ҳажми ортиб бормоқда, саноат зоналари фаолияти кенгаймоқда.
Энг муҳими, дунёнинг турли мамлакатларидан бўлган инвесторларнинг туманимизга бўлган қизиқиши йил сайин ортиб бормоқда. Бу эса амалга оширилаётган ислоҳотларнинг тўғрилиги, ҳудуднинг иқтисодий салоҳияти юқорилиги ҳамда давлат ва инвестор ўртасидаги ўзаро ишонч мустаҳкамланаётганининг ёрқин далилидир.
Бугун ишга туширилаётган “Enco Group” МЧЖ ҚК корхонаси ҳам ана шундай истиқболли ва муҳим лойиҳалардан биридир.
Тўғридан-тўғри хорижий инвестициялар ҳисобидан амалга оширилган мазкур лойиҳага жами 57,5 миллион АҚШ доллари миқдорида маблағ йўналтирилди.
Туманимизнинг “Тут” маҳалласи ҳудудида 21 гектар майдонда барпо этилган ушбу замонавий саноат мажмуаси 485 нафар фуқаромизни доимий иш ўрни билан таъминлайди.
Бу эса юзлаб оилаларнинг даромади ошиши, аҳоли бандлигининг таъминланиши ва маҳаллий иқтисодиётнинг янада мустаҳкамланишига хизмат қилади.
Лойиҳа доирасида йилига 24 минг тонна юқори кучланишли кабель маҳсулотлари, мис трубкалари ва изоляцияланган мис шиналари ишлаб чиқариш қуввати яратилгани алоҳида аҳамиятга эга.
Энг муҳими, мазкур корхона фаолияти натижасида республикамизда илк бор 110 киловольт, 220 киловольт ва 330 киловольтли юқори кучланишли кабель маҳсулотларини маҳаллийлаштирилган ҳолда ишлаб чиқариш йўлга қўйилмоқда.
Бу нафақат саноат соҳасидаги муҳим технологик ютуқ, балки мамлакатимиз энергетика, қурилиш ва инфратузилма тармоқлари учун стратегик аҳамиятга эга бўлган маҳсулотларни маҳаллий ишлаб чиқариш имкониятини яратади.
Натижада бугунга қадар импорт орқали келтирилаётган мазкур маҳсулотларга бўлган эҳтиёжнинг катта қисми ички ишлаб чиқариш ҳисобига қопланади ва импорт ҳажми қарийб 60 фоизга қисқаради. Бу эса мамлакатимиз иқтисодиёти учун валюта маблағларини тежаш, ташқи бозорларга қарамликни камайтириш ҳамда миллий саноат рақобатбардошлигини оширишга хизмат қилади.
Бундай лойиҳалар нафақат иқтисодий самара, балки юқори технологиялар трансфери, илғор ишлаб чиқариш тажрибаларини жорий этиш, маҳаллий мутахассисларнинг малакасини ошириш ва саноат кооперациясини кенгайтириш нуқтаи назаридан ҳам муҳим аҳамият касб этади.
Фурсатдан фойдаланиб, мазкур йирик инвестиция лойиҳасини амалга оширишда иштирок этган инвесторлар, ҳамкорлар, муҳандислар, қурилиш ташкилотлари, мутахассислар ва барча меҳнат жамоасига самимий миннатдорлик билдираман.
Ишончим комилки, “Enco Group” корхонаси яқин йилларда нафақат мамлакатимиз ички бозорида, балки халқаро бозорларда ҳам муносиб ўрин эгаллайдиган, юқори сифатли ва рақобатбардош маҳсулотлар ишлаб чиқарувчи етакчи саноат корхоналаридан бирига айланади.
Бугунги қувончли воқеа билан барчангизни яна бир бор табриклайман. Корхона фаолиятига улкан муваффақиятлар, инвесторларимизга янги зафарлар, меҳнат жамоасига эса барқарор ривожланиш ва юксак натижалар тилайман.
Эътиборингиз учун раҳмат!