Оҳангарон тумани ҳокими Баҳром Норқобиловнинг битирувчи ёшларга байрам табриги
2026-05-25 09:55:00 / Раҳбариятнинг баёнотлари ва нутқлари
Қадрли битирувчи ўғил-қизларим!
Аввало, барчангизни юртимиздаги унутилмас байрамлардан бири — “Сўнгги қўнғироқ” айёми билан самимий муборакбод этаман.
Бугун битирувчиларимиз учун алоҳида тарихий кун. Чунки бу мактаб остонасидаги беғубор болалик йиллари ортда қолиб, мустақил ҳаёт сари илк қадамлар қўйилаётган кундир.
Якунланиб бораётган 2025/2026-ўқув йили туманимиз таълим тизими учун улкан ютуқлар ва юқори натижалар йили бўлди. Бу эса, аввало, устозларнинг фидокорона меҳнати, ўқувчиларнинг интилиши ҳамда ота-оналарнинг қўллаб-қувватлаши самарасидир.
Азиз битирувчилар!
Ҳаёт синовлардан иборат. Олдингизда ҳали катта мақсадлар, муҳим қарорлар, масъулиятли йўллар турибди. Аммо сизларда билим бор, орзу бор, интилиш бор. Энг муҳими — сизларга ишонадиган ота-она, меҳр берган устоз ва сизларни қўллаб-қувватлайдиган Ватан бор.
Шунинг учун ҳеч қачон орзу қилишдан тўхтаманг. Ҳеч қачон изланишдан чарчаманг! Илм олишдан ортга чекинманг! Чунки бугунги замонда энг катта куч — билим ва тафаккурдир.
Ишонаманки, сизлар келажакда шифокор, муҳандис, ўқитувчи, тадбиркор, ҳарбий, олим ва давлатимиз равнақига ҳисса қўшадиган етук мутахассислар бўлиб етишасиз.
Қадрли ёшлар!
Қаерда бўлманг, қайси соҳада фаолият юритманг, аввало, инсон бўлиб қолинг. Ватанга садоқатли, ҳалол, меҳнатсевар ва юрт равнақи учун дахлдорлик ҳисси билан яшанг. Ота-онангиз, устозларингиз ва мактабингиз номини доимо юксак тутинг.
Ишонаман, сизлар Оҳангарон туманининг, Тошкент вилоятининг ва бутун Ўзбекистоннинг муносиб фарзандлари бўласиз.
Яна бир бор барчангизни “Сўнгги қўнғироқ” байрами билан табриклайман!
Барчангизга мустаҳкам соғлиқ, бахт-саодат, катта зафарлар ва ёруғ келажак тилайман.
Оқ йўл сизларга, азиз битирувчилар!
Баҳром НОРҚОБИЛОВ, Оҳангарон тумани ҳокими.