Оҳангарон тумани ҳокими Баҳром Норқобиловнинг 9 май – Хотира ва қадрлаш куни муносабати билан байрам табриги
2026-05-08 12:25:00 / Раҳбариятнинг баёнотлари ва нутқлари
Ассалому алайкум, қадрли тумандошлар!
Аввало, барчангизни 9-май – Хотира ва қадрлаш куни билан самимий муборакбод этаман.
Бу сана — халқимизнинг матонати, жасоратини улуғлайдиган, юрт тинчлиги йўлида жонини фидо қилган аждодларимиз хотирасига юксак эҳтиром кўрсатиладиган ҳамда бугунги кекса авлод вакиллари, меҳнат фронти қатнашчилари, уруш ва меҳнат фахрийлари эъзозланадиган қутлуғ кундир.
Иккинчи жаҳон уруши йилларида минглаб юртдошларимиз қатори оҳангаронлик фидойилар ҳам фронт ва фронт ортида беқиёс жасорат намунасини кўрсатиб, бугунги осойишта ҳаётимиз учун муносиб ҳисса қўшган. Уларнинг жасорати, сабр-бардоши ва Ватанга муҳаббати ҳар биримиз учун ҳақиқий ибрат мактабидир.
Шунингдек, нуронийларимизнинг ҳаёт йўли, меҳнати ва фидокорона хизматлари ёш авлод учун катта сабоқ ва юксак намунадир.
Азиз тумандошлар!
Юртимиз тинчлиги, хонадонларимиз файзу баракаси, халқимиз осойишталиги доимо барқарор бўлсин. Фидойи инсонлар хотираси абадий яшайди, уларнинг жасорати ҳеч қачон унутилмайди.
Яна бир бор барчангизни 9-май – Хотира ва қадрлаш куни билан чин қалбимдан табриклайман. Сизларга мустаҳкам соғлиқ, оилангизга бахт-саодат, юртимизга тинчлик ва равнақ тилайман.
Ҳурмат билан,
Оҳангарон тумани ҳокими Баҳром НОРҚОБИЛОВ.