Баҳром Норқобилов: ҳар бир мурожаат ортида инсон тақдири турганини унутмаслигимиз керак
2026-03-30 12:20:00 / Янгиликлар
Оҳангарон тумани ҳокими Баҳром Норқобилов раислигида навбатдаги “Ҳокимлик соати” йиғилиши ўтказилди. Унда долзарб бўлган бир қатор масалалар танқидий-таҳлилий руҳда кўриб чиқилди.
Йиғилиш аввалида ижро интизоми ва назорат ишларининг ҳолати атрофлича муҳокама қилинди. Масъул ташкилотлар томонидан топшириқларни ўз вақтида ва сифатли бажариш, ҳужжатлар ижросини таъминлаш борасидаги камчиликлар танқид қилинди ҳамда уларни бартараф этиш юзасидан аниқ вазифалар белгилаб берилди.
Шунингдек, жисмоний ва юридик шахслар мурожаатлари билан ишлаш ҳолати таҳлил қилинди. Фуқаролардан келиб тушаётган ариза ва шикоятларни ўз вақтида кўриб чиқиш, уларнинг қонуний ечимини таъминлаш, мурожаатлар билан ишлашда масъулиятни янада ошириш лозимлиги таъкидланди.
Йиғилишда “Яшил макон” умуммиллий лойиҳасининг 2026-йил баҳорги мавсуми доирасида амалга оширилаётган ишларга ҳам алоҳида эътибор қаратилди. Хусусан, дарахт кўчатлари экиш ишларини жадаллаштириш, ҳудудларни кўкаламзорлаштириш, экилаётган кўчатларнинг парваришини таъминлаш масалалари муҳокама қилинди. Масъулларга белгиланган режаларни ўз вақтида ва сифатли бажариш бўйича топшириқлар берилди.
Шу билан бирга, қишлоқ хўжалиги соҳасидаги мавжуд имкониятлардан тўлиқ фойдаланиш, ғаллачилик, пиллачилик ҳамда картошка экиш ишларини изчил ташкил этиш, аҳоли томорқаларида юқори ҳосилдорликка эришиш орқали озиқ-овқат хавфсизлигини таъминлаш масалалари муҳокама этилди.
Йиғилиш якунида белгиланган вазифалар ижросини таъминлаш юзасидан масъулларга аниқ топшириқлар берилди ҳамда ҳар бир йўналиш бўйича шахсий масъулият кучайтирилиши таъкидланди.