Тошкент вилояти Оҳангарон тумани ҳокимлиги

Ассалому алайкум, ҳурматли туманимиз аҳли!

Қадрли меҳмонлар!

 

Барчангизни кўҳна ва ҳамиша навқирон, қалбларга шодлик ва умид бағишловчи улуғ айём — Наврўз умумхалқ байрами билан самимий муборакбод этаман!

 

Наврўзнинг мазмун-моҳияти жуда кенг ва серқиррадир. Бу — тарихан узоқ асрларга бориб тақаладиган, халқимизнинг азалий миллий анъаналари, бой маънавий қадриятлари ва эзгу орзу-ниятларини ўзида мужассам этган улуғ байрамдир. Наврўз — аждодларимизнинг ҳаётий тажрибаси, табиат билан уйғунликда яшаш фалсафаси ва меҳнатга бўлган эҳтиромининг ёрқин ифодасидир.

 

Наврўз — бу, аввало, баҳор, янгиланиш ва яратувчанлик тимсолидир. Бу фасл билан табиат уйғонади, ер юзи яшилликка бурканади, қалбларимизга илиқлик ва умид кириб келади. Қишнинг синовли кунларидан сўнг, табиатдаги бу уйғониш инсон руҳиятига ҳам ижобий таъсир кўрсатиб, янги марралар сари интилишга илҳом бахш этади.

 

Ушбу қутлуғ айёмда юртимизда меҳр-оқибат, саховат ва инсонпарварлик туйғулари янада юксалади. Эҳтиёжманд ва кам таъминланган оилалар ҳолидан хабар олиш, кексаларни эъзозлаш, беморларга кўмак бериш каби эзгу амаллар халқимизнинг азалий фазилати сифатида намоён бўлади. Бу — бирдамлик ва ҳамжиҳатликни мустаҳкамлайдиган, жамиятимизда меҳр ва бағрикенглик муҳитини кучайтирадиган муҳим омилдир.

 

Наврўз айёмида миллий таомларимиз — сумалак, ҳалим каби қадимий анъаналаримизга хос таомлар тайёрланиб, халқ сайиллари, маданий ва маънавий тадбирлар ташкил этилади. Бу жараёнларда барча авлод вакиллари бир жойга жам бўлиб, ҳамжиҳатлик ва аҳиллик муҳитида байрамни кўтаринки кайфиятда нишонлайди. Бу эса халқимизнинг бир тану бир жон бўлиб яшаши, бир-бирига бўлган ҳурмат ва эҳтиромини янада мустаҳкамлайди.

 

Айни пайтда, Наврўз — деҳқончилик мавсумининг бошланиши ҳамдир. Ерга уруғ қадаш, мўл ҳосил учун дуо қилиш, меҳнатга бел боғлаш каби анъаналар бу байрамнинг мазмун-моҳиятини янада бойитади. Бу — инсон ва табиат ўртасидаги узвий боғлиқликни ифода этувчи, меҳнат ва бараканинг қадрини англатувчи муқаддас айёмдир.

 

Азиз юртдошлар!

 

Муҳтарам Президентимизнинг “2026 йилги Наврўз умумхалқ байрамига тайёргарлик кўриш ва уни ўтказиш тўғрисида”ги Қарорига мувофиқ, бу йилги байрам тантаналари “Наврўзни улуғлаш — инсонни улуғлашдир!” деган эзгу ғоя остида юртимиз бўйлаб кенг нишонланмоқда. Ушбу ғоянинг илгари сурилишида жуда катта мазмун-моҳият мужассамдир. Зеро, юртимизда амалга оширилаётган халқчил ислоҳотлар сабабли инсон қадри, унинг ҳуқуқ ва манфаатларини таъминлаш, халқимиз фаровонлигини юксалтириш, жамиятимизда тинчлик, дўстлик ва ҳамжиҳатлик муҳитини, ижтимоий адолатни таъминлаш йўлида улкан ишлар амалга оширилмоқда. Шу билан ҳамоҳанг тарзда қадимий тарих ва анъаналарга эга бўлган шарқона янги йил байрами — Наврўзи оламнинг инсонпарварлик, бағрикенглик, саховат ва меҳр-оқибат каби моҳияти бугунги кундаги ислоҳотларимиз билан янада уйғунлашмоқда.

 

Барчангизга маълумки, туманимизда барча соҳаларда кенг кўламли ислоҳотлар амалга оширилмоқда. Юртбошимиз томонидан жорий йилнинг “Маҳаллани ривожлантириш ва жамиятни юксалтириш йили”, деб эълон қилиниши бу борадаги ишларимизни янада жадаллаштиришга хизмат қилмоқда. Маҳаллаларда ободонлаштириш, инфратузилмани яхшилаш, аҳоли турмуш шароитини юксалтириш, тадбиркорликни қўллаб-қувватлаш борасида салмоқли ишлар амалга оширилмоқда.

 

Шунингдек, “Яшил макон” умуммиллий лойиҳаси доирасида туманимиз ҳудудида кўчат экиш, яшил ҳудудларни кенгайтириш, экологик муҳитни яхшилашга қаратилган ишлар изчил амалга оширилмоқда. Ҳар бир маҳаллада минглаб дарахт кўчатлари ўтқазилиб, бу ишлар аҳолининг фаол иштироки билан умумхалқ ҳаракатига айланмоқда. Бу эзгу ташаббус келажак авлодлар учун соғлом ва мусаффо муҳит яратишга хизмат қилади.

 

Азиз дўстлар!

 

Бу йил олдимизга улкан марраларни қўйиб, туманимизда кўплаб ишларни амалга оширишни режалаштирганмиз.

 

Жумладан, 2026 йилда туманда маҳаллалар инфратузилмасини тубдан яхшилаш мақсадида, 31 та маҳаллада 80 км.дан ортиқ узунликдаги ички кўчалар таъмирланади. Аҳолини тоза ичимлик суви билан таъминлаш мақсадида, 100 км. масофада сув қувурларини тортиш ишлари олиб борилади. Натижада, 958 та хонадон илк маротаба ичимлик суви билан таъминланиб, 1640 та хонадонда таъминот яхшиланади. Шунингдек, жойларда 14 та сув насоси янгиланади. Электр таъминотини яхшилаш мақсадида эса маҳаллаларда 6 та трансформатор, 1600 та темир-бетон таянчлар ўрнатилиб, 40 км. узунликдаги электр симларини тортиш ишлари олиб борилади. Шунингдек, 2026 йил инвестиция дастурига мувофиқ, 18 та лойиҳа доирасида 191 млрд. сўмлик ишлар амалга оширилади.

 

2026 йилда 6 та лойиҳа доирасида 250 млн. доллар миқдорида инвестиция ўзлаштирилиши ҳамда 853 та янги иш ўрни яратилиши режалаштирилган. Инновацион ишлаб чиқариш ҳажмини 12 фоизга ошириш асосий мақсадлардан этиб белгиланган бўлиб, бу борада жорий йилда 15 та инновацион лойиҳа амалга ошрилади.

 

Бу борада туманимизнинг макроиқтисодий кўрсаткичлари, хусусан, саноат ишлаб чиқариш ҳажми 12,8 трлн. сўм, хизмат кўрсатиш ҳажми қарийб 1 трлн. сўм, қишлоқ хўжалиги соҳасида 2,2 трлн. сўм, қурилиш йўналишида эса 1,1 трлн сўмга етказилиши режалаштирилган.   

 

Шунингдек, қишлоқ хўжалигининг ғаллачилик, полизчилик, боғдорчилик,  чорвачилик лойиҳалари асосида ҳамда аҳоли томорқаларидан самарали ва кенгроқ фойдаланишни ривожлантириш орқали ички бозорларни сифатли, арзон озиқ-овқат маҳсулотлари билан тўлдириш, озиқ-овқат хавфсизлигини, нарх-наво барқарорлигини таъминлаш устувор вазифамиз бўлиб қолади.

 

Жумладан, жорий йилда 47 000 тонна ғалла, 420 000 тонна мева маҳсулотлари, 64 600 тонна полиз маҳсулотлари, 17 600 тонна гўшт, 64 900 тонна сут ишлаб чиқариш режалаштирилган.

 

Шуни алоҳида таъкидлашни истардимки, бугунги кундаги ислоҳотларимизнинг асосида инсон қадрини улуғлаш, ҳар бир фуқаронинг ҳаётдан рози бўлиб яшашини таъминлашдек эзгу мақсад мужассамдир. Бу борада ҳар биримиз шу азиз Ватанимиз тараққиётига даҳлдорлик ҳиссини туйиб, ислоҳотларга ўз ҳиссамизни қўшишимиз зарур.

 

Туман раҳбари сифатида олдимизга қўйилган вазифаларни адо этишда Сиз – азиз оҳангаронликлар билан биргаликда ҳамжиҳатликда меҳнат қилиб, янада юксак марраларни эгаллашимизга ишонаман. Бу йўлда бирдамлик, фидойилик ва масъулият билан ҳаракат қилсак, албатта, туманимизнинг тараққиётини янги босқичга олиб чиқамиз. 

 

Қадрли тумандошлар!

 

Фурсатдан фойдаланиб, барчангизни яна бир бор ушбу қутлуғ айём — Наврўз байрами билан самимий табриклайман!

 

Юртимизда тинчлик ва осойишталик барқарор бўлсин, хонадонларимизга файз ва барака ёғилсин, ҳар бир оилага бахт-саодат, фаровонлик ва омад ёр бўлсин!

 

Наврўз байрами барчангизга муборак бўлсин!