Оҳангарон тумани ҳокими Баҳром Норқобилов “Маҳалла тизими ходимлари куни” муносабати билан байрам табриги
2026-03-22 09:03:00 / Раҳбариятнинг баёнотлари ва нутқлари
Ҳурматли маҳалла тизими ходимлари!
Азиз ва фидойи маҳалла фаоллари!
Сизларни “Маҳалла тизими ходимлари куни” муносабати билан самимий муборакбод этаман!
Маҳалла — халқимиз ҳаётида алоҳида ўрин тутадиган, азалдан инсонларни бирлаштириб келаётган, меҳр-оқибат, ҳамжиҳатлик ва ўзаро ҳурмат муҳитини қарор топтирувчи муқаддас маскандир. У нафақат ижтимоий институт, балки миллий қадриятларимизни асраб-авайлаш, ёш авлодни тарбиялаш ва жамиятда барқарорликни таъминлашда муҳим ўринга эга бўлган ҳаётий мактабдир.
Сиз — маҳалла тизими ходимлари ана шу муқаддас даргоҳнинг фидойи ва масъулиятли вакилларисиз. Ҳар бирингиз аҳоли дардини тинглаш, муаммоларга ечим топиш, кам таъминланган оилаларни қўллаб-қувватлаш, ёшлар ва аёллар билан ишлаш, жамиятда соғлом маънавий муҳитни шакллантириш каби ўта муҳим вазифаларни сидқидилдан адо этиб келмоқдасиз.
Бугунги кунда юртимизда маҳалла институтини янада ривожлантириш, унинг имконият ва ваколатларини кенгайтириш, аҳоли билан ишлаш самарадорлигини оширишга алоҳида эътибор қаратилмоқда. Бу эса сизларнинг зиммангизга янада катта масъулият юклайди.
Айниқса, “Маҳаллани ривожлантириш ва жамиятни юксалтириш йили”да маҳаллаларда ободонлаштириш ишларини амалга ошириш, аҳоли бандлигини таъминлаш, ижтимоий ҳимояга муҳтож фуқароларни қўллаб-қувватлаш, ҳуқуқбузарликларнинг олдини олиш ва аҳолининг турмуш фаровонлигини ошириш борасида олиб бораётган самарали ишларингиз алоҳида эътирофга лойиқ.
Азиз маҳалла ходимлари!
Сизларнинг заҳматли меҳнатингиз, халқпарварлик фаолиятингиз ва юрт равнақи йўлидаги хизматларингиз юксак қадрланади. Ҳар бир хонадонга кириб бориб, аҳоли билан юзма-юз мулоқотда бўлиш, инсон дардига шерик бўлиш — бу юксак инсонийлик ва масъулият намунасидир.
Фурсатдан фойдаланиб, барчангизга мустаҳкам соғлик, оилаларингизга бахт-саодат, иш фаолиятингизда янги ютуқ ва омадлар тилайман.
Туманимиз равнақи, халқимиз фаровонлиги йўлидаги шарафли ва масъулиятли фаолиятингизда куч-ғайрат тилайман!
“Маҳалла тизими ходимлари куни” барчангизга муборак бўлсин!
Ҳурмат билан Баҳром Норқобилов, Оҳангарон тумани ҳокими.