Оҳангарон тумани ҳокими Баҳром Норқобиловнинг 8 март — Халқаро хотин-қизлар куни муносабати билан байрам табриги
2026-03-07 09:00:00 / Раҳбариятнинг баёнотлари ва нутқлари
Муҳтарам ва азиз онахонлар, қадрли опа-сингиллар!
Аввало, Сиз – азизларни баҳорнинг илк ва энг гўзал байрами 8 март – Халқаро хотин-қизлар куни муносабати билан самимий муборакбод этаман. Барчангизга сиҳат-саломатлик, бахт-саодат, оилавий хотиржамлик ҳамда масъулиятли фаолиятингизда улкан муваффақиятлар тилайман.
Маълумки, Муҳтарам Юртбошимиз ташаббуслари билан мамлакатимизда хотин-қизларнинг жамиятдаги ўрни ва нуфузини юксалтириш, уларнинг ҳақ-ҳуқуқлари ва қонуний манфаатларини таъминлаш, қобилият ва имкониятларини тўлиқ рўёбга чиқариш борасида кенг кўламли ислоҳотлар амалга оширилмоқда. Бу саъй-ҳаракатлар натижасида аёлларимизнинг жамият ҳаётидаги иштироки янада мустаҳкамланиб, улар мамлакат тараққиётида фаол ва бунёдкор куч сифатида намоён бўлмоқда.
Айниқса, оила мустаҳкамлигини таъминлаш, хотин-қизларнинг бахтиёр ва фаровон турмуш кечириши учун мутлақо янгича тизим шакллантирилди. Хотин-қизларни ҳар томонлама қўллаб-қувватлаш, улар билан мақсадли ишларни ташкил этиш, оилаларда маънавий-ахлоқий муҳитни мустаҳкамлаш ва соғломлаштириш давлат сиёсатининг энг устувор йўналишларидан бирига айланди, десам янглишмаган бўламан.
Бугунги кунда мамлакатимизда хотин-қизларнинг сиёсий ва ҳуқуқий савияси, ижтимоий фаоллиги йилдан-йилга ортиб бораётгани барча соҳаларда яққол намоён бўлмоқда. Уларнинг суд-ҳуқуқ тизимида, давлат ва жамоат ташкилотларида, иқтисодиёт, таълим, тиббиёт, тадбиркорлик ва бошқа кўплаб йўналишлардаги самарали меҳнати юртимиз тараққиётига муносиб ҳисса қўшмоқда.
Бугунги кунда Оҳангарон туманида жами 48 минг 430 нафар хотин-қизлар истиқомат қилади. Уларнинг 18 минг 400 нафари фаол меҳнат қилувчи қатламни ташкил этиб, турли соҳаларда самарали фаолият юритмоқда. Жумладан, 6 минг нафардан зиёд хотин-қизлар саноат ва ишлаб чиқариш соҳасида, 9 минг нафардан ортиқ аёллар савдо, хизмат кўрсатиш ва ижтимоий соҳаларда, 1200 нафардан ортиқ хотин-қизлар таълим тизимида, 1100 нафардан зиёд аёллар тиббиёт соҳасида меҳнат қилмоқда.
Шунингдек, бошқарув тизимида 350 нафардан зиёд хотин-қизлар фаолият олиб бормоқда. Туман Кенгаши депутатлари сафида эса 10 нафар аёл жамоатчилик манфаатлари йўлида хизмат қилиб келмоқда. Бундан ташқари, бугунги кунда туманда 160 нафар тадбиркор аёл, 4138 нафар оила бекалари, 7 нафар отинойи, 21 нафар хотин-қизлар фаоллари, 6 нафар ички ишлар органлари ходимлари, 1646 нафар олий таълимда таҳсил олаётган қизлар ҳамда 7500 нафардан ортиқ пенсия ёшидаги онахонлар борлиги ҳам жамиятимизда аёллар фаоллиги тобора ортиб бораётганининг ёрқин далилидир.
Азиз ва мўътабар онахонлар, муҳтарам опа-сингиллар!
Сизлар – оила файзи, хонадонларимиз чироғи, фарзандларимиз тарбиячиси, жамиятимиз маънавий таянчисиз. Сизларнинг меҳр-оқибатингиз, сабр-бардошингиз ва фидокорона меҳнатингиз юртимиз тараққиёти ва келажаги учун мустаҳкам пойдевор бўлиб хизмат қилмоқда.
Фурсатдан фойдаланиб, барчангизни ушбу айём билан яна бир бор чин қалбимдан табриклайман. Сизларга мустаҳкам соғлик, узоқ умр, оилавий бахт-саодат тилайман.
Байрамингиз муборак бўлсин, азиз ва муҳтарам аёллар!
Баҳром НОРҚОБИЛОВ, Оҳангарон тумани ҳокими.