Оҳангарон ҳокими “Чинор” маҳалласида аҳоли ва ёшлар билан очиқ мулоқот ўтказди
2026-02-26 18:00:00 / Янгиликлар
Учрашув аввалида туман раҳбари маҳалла еттилигининг амалга оширган ишлари, ижтимоий-иқтисодий кўрсаткичлари ҳамда келгусидаги режалари билан танишди. Маҳаллада ободонлаштириш, аҳоли бандлигини таъминлаш ва ижтимоий ҳимояга муҳтож оилаларни қўллаб-қувватлаш борасида олиб борилаётган ишлар юзасидан ахборот берилди.
Шундан сўнг фуқароларнинг мурожаатлари тингланди. Хусусан, яйлов масаласини тартибга солиш, эскирган электр тармоқларини янгилаш, ички йўлларни шағаллаштириш, шунингдек, маҳалла гузари қурилиши ишларига моддий кўмак бериш юзасидан таклиф ва илтимослар билдирилди.
Ҳар бир мурожаат атрофлича муҳокама қилиниб, масъул ташкилотлар ва мутасаддиларга аниқ вазифалар юклатилди. Муаммоларни босқичма-босқич ҳал этиш, ижросини қатъий назоратга олиш бўйича тегишли топшириқлар берилди.
Шунингдек, “Пайшанба – ёшлар куни” муносабати билан туман ҳокими шу ернинг ўзида маҳалла ёшлари билан ҳам мулоқот қилди. Ёшларнинг таълим, касб-ҳунар эгаллаш, спорт ва тадбиркорлик соҳаларидаги таклифлари эшитилиб, уларни қўллаб-қувватлаш юзасидан зарур чора-тадбирлар белгилаб олинди.