Оҳангарон туманидаги “Agro Eko Farm” МЧЖ чорвачилик комплексида “Ўзбекистон Республикасида чорвачилик ва унинг тармоқларини ривожлантириш бўйича қарорлар билан белгилаб берилган имтиёзлар” мавзусида илмий-амалий семинар бўлиб ўтди.

Тадбирда туман ҳокими Баҳром Норқобилов, Ўзбекистон Республикаси Ветеринария ва чорвачиликни ривожлантириш қўмитаси раиси ўринбосари, Ўзнаслчилик корхонаси директори, Чорвачилик ва паррандачилик илмий-тадқиқот институти, Қишлоқ хўжалиги ва озиқ-овқат таъминоти илмий ишлаб чиқариш маркази олимлари, соҳавий мутахассислар ҳамда чорвачиликка ихтисослашган фермер хўжаликлари раҳбарлари иштирок этди.

Семинарни туман ҳокими Баҳром Норқобилов очиб берди. У ўз сўзида мамлакатимизда чорвачилик тармоғини модернизация қилиш, наслчилик базасини мустаҳкамлаш, юқори маҳсулдор зотларни кўпайтириш ҳамда соҳада тадбиркорликни қўллаб-қувватлаш борасида қабул қилинган қарорлар ва яратилаётган имтиёзлар ҳақида батафсил тўхталиб ўтди.

Таъкидланганидек, соҳада илмий ёндашувни кучайтириш, инновацион технологияларни жорий этиш ва халқаро тажрибани ўрганиш орқали маҳсулдорликни ошириш бугунги куннинг устувор вазифаларидан ҳисобланади.

Семинар давомида олимлар ва мутахассислар томонидан қатор долзарб мавзуларда маърузалар тингланди.

Жумладан, чорвачилик тармоқларини ривожлантиришда илмий ёндашувнинг аҳамияти, наслчилик ишларини такомиллаштириш, сунъий уруғлантириш технологияларини кенг жорий этиш, хориждан наслли молларни олиб келиш ва уларни маҳаллий шароитга мослаштириш, хорижий молиявий институтлар билан ҳамкорликни йўлга қўйиш масалалари атрофлича муҳокама қилинди.

Мутахассислар томонидан фермерлар учун амалий тавсиялар берилди, соҳада учраётган муаммолар ва уларнинг ечимлари юзасидан фикр алмашилди.

Тадбир доирасида иштирокчилар “Agro Eko Farm” МЧЖ чорвачилик комплекси фаолияти билан яқиндан танишди. Бўрдоқичиликка ихтисослашган мазкур комплексда бугунги кунда 400 бошдан ортиқ буқа ва 2800 бош қўй парваришланмоқда.

Комплексда замонавий парвариш усуллари жорий этилган бўлиб, 15 та янги иш ўрни яратилгани аҳоли бандлигини таъминлашда муҳим аҳамият касб этмоқда.

Семинарни кенг ёритиш мақсадида, оммавий ахборот воситалари вакиллари учун пресс-тур ташкил этилди. Журналистлар комплекснинг иш жараёни, яратилган шароитлар ва қўлланилаётган технологиялар билан танишиб, мутахассислардан батафсил маълумотлар олдилар.

Маълумот учун:

Оҳангарон туманида қишлоқ хўжалиги умумий ер майдони 119 минг гектар шундан: сувли 19 минг гектар, лалми 11 минг гектар, яйлов 89 минг гектарни ташкил этади.

Туманда бугунги кунда чорвачилик тармоқларида жами 327 та шундан: 205 та фермер хўжаликлари ва 122 та МЧЖлар бўлиб, шундан қорамолчиликда 68 та, қўй-эчкичиликда 221 та, йилқичиликда 6 та, паррандачиликда 10 та, балиқчиликда 16 та, асаларичиликда 1 та хўжаликлар фаолият юритмоқда.

Ушбу чорвачилик корхоналарига 87 минг 576 гектар шундан: 7996 гектар сувли, 6856 гектар лалми ва 69 минг865 гектар яйлов ерлар ажратилган.

Чорвачилик йўналишидаги фермер ва қишлоқ хўжалиги корхоналарида жами қорамоллар сони 21,5 минг бош шундан: сигирлар 3,8 минг бош, қўй ва эчкилар 181 минг бош, отлар 4,4 минг бош, паррандалар 1,4 млн бошни ташкил этади.

Чорвачилик субъектлари томонидан 2025-йилда гўшт 8,2 минг тонна, сут 8 минг тонна, тухум 86,6 млн.дона, балиқ 40,7 тонна, асал 10,6 тонна етиштирилган.

Жорий йил учун жами умумий қиймати 848 млрд. сўмлик 59 та лойиҳа режалаштирилган бўлиб, четдан наслли 6350 бош қорамол ва 2961 бош қўй ҳамда 816 минг бош наслли парранда олиб келинади.

Қорамолчиликда 5,6 млрд. сўмлик 19 та, қўйчиликда 26 млрд. сўмлик 20 та, йилқичиликда 3 млрд. сўмлик 2 та, паррандачиликда 812 млрд. сўмлик 6 та, балиқчиликда 1млрд. сўмлик 1 та, асаларичиликда 660 млн. сўмлик 10 та, сут маҳсулотини қайта ишлаш 550 млн. сўмлик 1 талойиҳа шакллантирилган ва йил якунига қадар ишга туширилади.