Хоким табриги
2026-08-20 08:10:00 / Янгиликлар
Ассалому алайкум!
Ҳурматли тадбиркорлар, азиз ишбилармонлар!
Сизларни мамлакатимизда тадбиркорлик ва ишбилармонлик соҳасида фаолият юритаётган барча фидойи инсонлар учун муҳим сана — Тадбиркорлар куни муносабати билан шаҳримиз фаоллари ва ҳокимлик жамоаси номидан самимий муборакбод этаман!
Бугунги кунда тадбиркорлик нафақат иқтисодий тараққиётнинг муҳим омили, балки янги иш ўринларини яратиш, аҳоли даромадларини ошириш, ҳудудлар инфратузилмасини ривожлантириш ва халқимиз фаровонлигини юксалтиришнинг муҳим таянчига айланмоқда.
Айниқса, Навоий шаҳрида ўз ташаббуси, билим ва тажрибаси, машаққатли меҳнати билан турли соҳаларда фаолият юритаётган тадбиркорларимизнинг саъй-ҳаракатлари алоҳида эътирофга лойиқ. Сизларнинг янги ишлаб чиқариш қувватларини ташкил этаётганингиз, замонавий хизматларни йўлга қўяётганингиз, маҳаллий маҳсулотлар ишлаб чиқариш ва экспорт салоҳиятини оширишга ҳисса қўшаётганингиз шаҳар иқтисодий ривожига катта хизмат қилмоқда.
Тадбиркор — бу, аввало, ташаббускорлик, масъулият, қатъият ва таваккални ўз зиммасига олиб, янги имкониятларни яратишга интиладиган инсондир. Сизларнинг ҳар бир янги лойиҳангиз, ҳар бир яратилган иш ўрнингиз ва ҳар бир амалга оширилган ташаббусингиз юртимиз тараққиётига қўшилаётган муносиб ҳиссадир.
Фурсатдан фойдаланиб, шаҳримизда фаолият юритаётган барча тадбиркорларни давлат ва жамият ривожига қўшаётган муносиб ҳиссаси учун миннатдорлик билдираман. Келгусида ҳам сизларнинг қонуний манфаатларингизни қўллаб-қувватлаш, янги лойиҳаларни амалга оширишингиз учун қулай шарт-шароитлар яратиш ва тадбиркорлик муҳитини янада яхшилаш йўлидаги ишлар изчил давом эттирилади.
Азиз тадбиркорлар!
Сизларга мустаҳкам соғлик, оилавий фаровонлик, хонадонларингизга тинчлик-хотиржамлик, фаолиятингизга улкан зафар ва ривож тилайман. Янги ғоя ва ташаббусларингиз доимо қўллаб-қувватланиб, барча эзгу мақсадларингиз рўёбга чиқсин. Корхона ва ташкилотларингиз равнақ топиб, янги лойиҳалар, янги иш ўринлари ва янги муваффақиятлар сари дадил қадам ташлашингизга тилакдошман.
Барчангизни "Тадбиркорлар куни" билан яна бир бор чин қалбимдан муборакбод этаман!
Байрамингиз муборак бўлсин!
Ҳурмат билан,
Навоий шаҳар ҳокими
Дилмурод Эргашев