Сенат Раиси хотин-қизлар бандлигини таъминлаш бўйича ишларни маҳалладан бошлаш мақсадида Янгийўл туманида бўлди
2024-03-16 17:05:00 / Пресс-релизлар
Вилоят, туман, шаҳар ҳокимлари, ҳокимликларнинг хотин-қизлар ишлари бўйича ўринбосарлари ҳамда фаол аёллар Комиссия билан биргаликда жорий йилда 9 442 та маҳалладаги 580 мингга яқин ишсиз аёлларнинг бандлигини таъминлашга масъул этиб белгиланиши, бир ой муддатда хотин-қизларни тадбиркорликка кенг жалб қилиш бўйича алоҳида дастур қабул қилиниши айтиб ўтилганди.
Ушбу лойиҳаларни амалга ошириш учун Тикланиш ва тараққиёт жамғармаси ҳисобидан Халқ банки, Бизнесни ривожлантириш банки ҳамда Микрокредитбанкка зарур ресурслари ажратилди, шунингдек, хорижий грант маблағларини жалб қилиш чоралари кўрилмоқда.
Бу борадаги ишларни мувофиқлаштириб бориш Олий Мажлис Сенати Раиси Танзила Нарбаева раҳбарлигидаги Комиссия зиммасига юклатилди.
Шу мақсадда Сенат Раиси раҳбарлигида мутасадди вазирлик ва идоралар, тижорат банклари вакилларидан иборат ишчи гуруҳ тузилиб, олдидаги вазифалар белгилаб олинди. Шунингдек, 2024-2025 йилларда тадбиркорлик, даромад топишга қаратилган муайян меҳнат фаолияти билан шуғулланиш ва фаолият турини кенгайтириш истагини билдирган хотин-қизларни қўллаб-қувватлаш дастурини ишлаб чиқиш ишлари бошланди.
Олий Мажлис Сенати Раиси Танзила Нарбаева бошчилигидаги республика ишчи гуруҳи хотин-қизлар бандлигини таъминлаш, тадбиркорлик фаолиятини қўллаб-қувватлаш бўйича ишларни маҳалладан бошлаш мақсадида Тошкент вилоятининг Янгийўл туманида бўлди.
Дастлаб туман ҳокимиятида республика ишчи гуруҳи аъзолари, вилоят ва туман масълуллари билан учрашув ўтказилиб, вазифалар белгиланди. Аҳолиси 3 минг нафардан зиёдни ташкил этадиган “Қирсадақ” маҳалласи намунавий иш ташкил этиш учун танлаб олинди.
Шунингдек, ишчи гуруҳ аъзолари “Қирсадақ” маҳалласида бўлиб, маҳалла фаоллари, нуронийлар, отинойилар, маҳалла еттилиги билан учрашув ўтказди ҳамда бевосита маҳаллада амалга ошириладиган ишларни келишиб олди.
Эндиликда ишчи гуруҳ аъзолари уйма-уй юриб, хатлов ўтказган ҳолда маҳалла аҳолисининг ҳар бири шуғулланиши мумкин бўлган фаолият турларини аниқлайди ҳамда унинг натижаларидан келиб чиқиб, маҳаллани ривожлантириш режасини ишлаб чиқади. Шу билан бирга ушбу жараёнда ижтимоий-ҳимояга, тиббий, психологик ёрдамга муҳтож фуқароларга кўмак бериш чораларини кўради.
Сенат Раиси “Қирсадақ” маҳалласида Наврўз байрами арафасида ташкил этилган умумхалқ хашарида ҳам иштирок этди.
https://senat.uz/oz/in-places/post-1889