Жорий йилнинг 25 март куни Инвестициялар, саноат ва савдо вазирлигида Корея Республикаси ташқи ишлар вазири ўринбосари Чунг Бён Вон билан учрашув бўлиб ўтди. Суҳбат ўзаро муносабатларнинг турли йўналишларидаги икки томонлама иқтисодий шерикликнинг долзарб масалаларига бағишланди.

Савдо ва сармоявий ҳамкорликда эришилган кўрсаткичлар алоҳида таъкидланди. Савдо айланмаси 2017 йилдаги 1,3 миллиард доллардан 2023 йилда 2,3 миллиард долларга етди. Жорий йилнинг дастлабки икки ойида ўзаро товар айирбошлаш ҳажми ўтган йилнинг шу даврига нисбатан 20 фоизга ошди. Охирги беш йил ичида Ўзбекистонда Корея капитали иштирокидаги корхоналар сони икки баробарга ошиб, 983 тага етди, уларнинг ярмидан кўпи, йъани 605 таси – 100 фоиз хорижий капиталга асосланган. Ўзаро товар айирбошлаш ҳажмини ошириш бўйича ишларни давом эттириш зарурлиги таъкидланди.

Суҳбат чоғида икки давлатнинг алоҳида стратегик шериклиги нуқтаи назаридан келишувларни ўз вақтида амалга ошириш ва олий даражадаги сармоявий ҳамкорликни кенгайтириш чора-тадбирлари муҳокама қилинди. Шу нуқтаи назардан, Корея томони Корея ҳукуматининг ижтимоий аҳамиятга молик лойиҳаларни амалга ошириш учун молиявий ва техник ёрдамни оширишга ҳамда Ўзбекистонда металлургия, электротехника маҳсулотлари ишлаб чиқариш ва инфратузилмани ривожлантириш соҳаларида йирик инвестиция лойиҳаларни биргаликда амалга оширишга тайёрлигини тасдиқлади.

Ўзбекистон ва Жанубий Корея ишбилармон доиралари вакиллари ўртасидаги тўғридан-тўғри алоқаларни мустаҳкамлаш истиқболлари алоҳида таҳлил қилинди. Ҳудудлараро форумларни ишлаб чиқиш ва ўтказиш механизмлари келишиб олинди, улар давомида бизнес вакиллари қўшма имкониятларни муҳокама қилишлари, битим ва шартномалар тузишлари мумкин бўлади.

Суҳбат якунида ўзаро савдо ҳажмини ошириш ва диверсификация қилиш бўйича қўшма йўл харитасини ишлаб чиқиш, шунингдек, йирик Корея компанияларини мамлакатимизда истиқболли инвестиция лойиҳаларини амалга оширишга жалб этиш бўйича келишувга эришилди.