Фарғона вилояти Марғилон шаҳар ҳокимлиги

8 март – Халқаро хотин-қизлар байрамининг айнан баҳор фаслида нишонланиши замирида ҳам ўзига хос маъно ва ҳикмат мужассам.
Зотан, баҳор ва аёл сўзлари бир-бирига ҳамоҳанг ва уйғундир.

 Дарҳақиқат, севги ва садоқат, меҳр-муҳаббат, назокат ва латофат каби энг нозик туйғуларни аёлларсиз асло тасаввур эта олмаймиз. Зеро, азиз аёлларимиз ҳамиша кўз ўнгимизда меҳрибон она, фидойи етакчи, садоқатли ёр тимсолида гавдаланади.

Бугун шаҳримиздаги Маданият марказида айём муносабати билан бўлиб ўтган тадбирда ҳам муҳтарама онахонларимиз, азиз опа-сингилларимиз яна бир карра эъзозланди, эътироф этилди.

Тантанани шаҳар ҳокими Шукуруллохон Нисбатхонов самимий табрик сўзи билан очиб бугунги кунда мамлакатимизда, хусусан шаҳримизда ҳам хотин-қизларнинг иқтисодий-cиёсий ва ижтимоий фаоллигини ошириш, уларнинг турли соҳа ва тармоқларда ўз қобилият ва имкониятларини рўёбга чиқариши учун шарт-шароит яратиш борасида амалга оширилаётган кенг кўламли ишлар хусусида тўхталиб ўтди. 

Шундан сўнг давомий қарсаклар садоси остида азиз опа-сингилларимизга байрам совғалари улашилди.
 
Шаҳар Маданият марказининг хушовоз хонандалари, санъат усталари иштирокидаги бадиий-мусиқий дастур барчага байрам шукуҳини улашди.