2026 йил 8-март “Халқаро хотин-қизлар”
2026-03-08 00:00:00 / Раҳбариятнинг баёнотлари ва нутқлари
Ассалому алайкум, қадрли опа-сингиллар, мўътабар онахонлар !
Аввало, сиз, азизларни, сизлар орқали бутун Косонсой аёлларини
8 март – Халқаро хотин-қизлар байрами билан чин қалбимдан самимий муборакбод этаман.
Мутафаккир бобомиз Алишер Навоий буюк она сиймоси, мўътабар аёл зотини улуғлаб, уларнинг бахт-саодати йўлида барчамизни фидокор бўлишга даъват этгани албатта бежиз эмас.
Чиндан ҳам, меҳр-оқибат, олижаноблик, муҳаббат ва садоқат каби юксак инсоний қадриятларни камол топтиришда, оила қўрғонини мустаҳкамлашда сизларнинг хизматингизни ҳеч нарса билан қиёслаб бўлмайди.
Бугунги қутлуғ байрамнинг файзли Рамазон ойида бўлиб ўтаётгани унинг эзгу руҳи ва мазмунини янада оширмоқда.
Муқаддас динимиз ҳам муҳтарама оналаримиз, дилбар опа-сингилларимиз, мунис қизларимизга ҳамиша яхшилик қилишга, уларнинг иззат-ҳурматини жойига қўйишга буюради.
Шу боис Давлатимиз раҳбарининг Рамазон ойида меҳр ва мурувватга муҳтож бўлган фуқаролар, жумладан хотин-қизлар ҳолидан хабар олиш юзасидан қабул қилган Қарорлари ижроси доирасида тумандаги 496 нафар аёлларга 150 млн сўмдан ортиқ моддий ва маънавий кўмак кўрсатилди.
Ҳурматли тадбир иштирокчилари!
Сўнгги йилларда мамлакатимизда бевосита Давлатимиз раҳбари бошчиликларида хотин-қизларнинг ҳуқуқ ва манфаатларини тўлиқ таъминлаш, уларнинг қадр-қимматини улуғлаш давлат сиёсати даражасига кўтарилди. Бугунги кунда аёллар турли соҳа ва тармоқларда жамиятнинг жадал тараққиёти учун ўзларининг муносиб ҳиссаларини қўшиб келмоқдалар.
Маълумот учун, 2017 йилда раҳбарлик соҳасида ходимларнинг
20 фоизини хотин-қизлар ташкил этган бўлса, ҳозирги вақтда бу рақам
35 фоизга етди. Бугунги кунда Халқ депутатлари Косонсой туман Кенгашига 6 нафар, вилоят кенгашига эса 2 нафар аёлларимиз депутат сифатида сайландилар. 2025-2026 ўқув йилида умумтаълим мактаблари ва техникумларни 2090 нафар қизлар тамомлаган бўлиб, 538 нафар қизларимиз олий таълимга қамраб олинди.
Яна 382 нафар хотин-қиз касб-ҳунар ва тадбиркорликка ўқитилди.
Албатта, аёллари ўқимишли ва касб-ҳунарли бўлган юртда тинчлик ва тараққиёт бўлади. Аёллари маърифатли бўлган халқ албатта бахтли бўлади.Таҳлил қилинганда бу кўрсаткич 2017 йилга нисбатан 3,5 карра кўп дегани. Натижада ҳар бир маҳалладан нафар хотин-қиз олийгоҳларда таълим олиш имконига эга бўлди.Ўтган йили республика ва жаҳон спорт ўйинларида туман аёл спортчилари жумладан:
33 мактабнинг қўл тўпи қизлар жамоаси республика спорт мусобиқасида қатнашиб 1 ўринни эгаллаб олтин медалга сазовор бўлишган, Кураш бўйича Ваҳобова Сайёра жаҳон чемпионатида 3 ўринни эгаллаб бронза медалини қўлга киритган. Бадиий гимнастика жамоамиз Президент кубогида қатнашиб 2 ўринни эгаллаб кумуш медалини қўлга киритгани юқоридаги гапларнинг исботидир.
Косонсойлик қизларимиз маданият ва санъат соҳасида ҳам туманимиз шарафини муносиб ҳимоя қилиб келмоқдалар. Ўтган йили маданият ва санъат соҳасидаги турли танловларда
20 нафардан ортиқ истеъдодли қизларимиз ғолиб бўлганлари ҳам шундан далолат беради.
Аёлни муқаддас билиш, унга алоҳида эҳтиром кўрсатиш, озод ва обод юртимиз келажаги бўлган ҳар томонлама етук ёшларни тарбиялашдаги беқиёс ўрнини яна бир бор эътироф этиш, баркамол, оқила хотин-қизлар авлодини вояга етказиш, улар орасидаги иқтидорли ёшларнинг таълим, фан, адабиёт, маданият, санъат, спорт, тиббиёт, ахборот технологияларини ривожлантириш ва жамоатчилик фаолиятидаги ютуқлари, тенгдошларининг миллий истиқлол ғоялари ва маданий-маънавий қадриятларга эътиқодининг юксалиши йўлидаги ибратли фаолияти, кенг кўламли ислоҳотларни жадаллаштиришдаги фаол иштирокини рағбатлантириш мақсадида таъсис этилган Зулфия номидаги давлат мукофотини Улуғҳўжаева Муқаддас, Усубжонова Шохсанам, Ёқубжонова Шахноза, Тожибоева Олима, Аҳмаджонова Муҳайё каби 5 нафар Косонсойлик қизларимиз қўлга киритганини ҳам алоҳида эътироф этиш лозим.
Қадрли опа-сингиллар!
Ҳурматли Президентимиз таъкидлаганларидек, Янги Ўзбекистонда хотин-қизларнинг оғирини енгил қилиш, улар учун барча соҳаларда зарур шароитларни яратиб бериш доимо давлат сиёсатининг энг устувор йўналишларидан бири бўлиб қолади.”
Янгиланган Конституциядаги ижтимоий давлат тамойилига мувофиқ, ижтимоий ҳимоя соҳасидаги ишлар натижасида ҳар бир маҳаллада хотин-қизларнинг ҳолати ўрганилиб, ижтимоий ҳимояга муҳтож ва эҳтиёжманд
5727 нафар хотин-қизлар “Аёллар дафтари”га киритилди.
Жорий йилда уларнинг ҳар бири билан манзилли ишлаб, ногиронлиги бўлган 1229 нафар аёлга санаторий, шифохона ва ўзлари яшаётган маҳаллада тиббий ёрдам кўрсатилди, бундан ташқари “Аёллар дафтари”га киритилган боқувчисини йўқотган
589 нафар, 1-2 гуруҳ ногиронлиги бўлган тезкор тиббий ёрдамга муҳтож 512 нафар, қарамоғида ногирон фарзанди бор 313 нафар хотин-қизларга 1 млрд 200 млн сўм миқдорида бир марталик моддий ёрдам берилди, яна
4 нафар уй-жойсиз аёллар ижтимоий уй билан таъминланди, 2452 нафар меҳнатга лаёқатли ва иш излаётган опа-сингилларимиз ишга жойлаштирилди.
Шунингдек, оғир вазиятга тушиб қолган 650 нафар хотин-қизларга психологик ёрдам кўрсатилди. Аёллар ўртасида жисмоний тарбия ва спорт оммалашиб бораётгани жамиятда соғлом муҳитни шакллантиришга катта туртки бермоқда. Шу боис, бу йил барча маҳаллалардаги 1000 нафардан ортиқ хотин-қизлар оммавий спорт мусобақаларига жалб қилинди.
Шунингдек, кейинги йилларда хотин-қизларнинг сифатли таълим олишига алоҳида эътибор қаратилаётгани натижасида 11 нафар ижтимоий ҳимояга мухтож, боқувчисини йўқотган хотин-қизларга 112 млн сўмга яқин контракт пули тўлаб берилди. Ҳозирги вақтда
10 нафардан ортиқ хотин-қизлар илмий фаолият билан шуғулланмоқда, илмий ишланмаларнинг 25 фоизини олима аёллар яратмоқда.
Энг асосийси хотин-қизлар бандлигини таъминлаш ва тадбиркорликка жалб этиш бўйича ҳам жуда катта дастурлар амалга оширилди. Жумладан, ўтган йилнинг ўзида бу мақсадларга 2 млрд сўм кредит ажратилди. Ана шундай эътибор туфайли 130 дан ортиқ аёллларимиз тадбиркорлик билан шуғулланмоқдалар. Жумладан Раҳимова Маликахон
2025 йилда 200 млн сўм миқдорида кредит эвазига дўппи тикиш дастгоҳи олиб, дўппичилик билан шуғулланиб ҳозирги кунда Хитой давлатидан олиб келинадиган дўппи ишлаб чиқариш учун керакли бўладиган хом ашьёни ўзи ишлаб чиқармоқда ва Марғилон ҳурнамандлари билан ҳамкорликда ишламоқда. Касаначилик асосида Чуст тумани ва ўзимизни туманимиздаги дўппичи аёлларимизга ярим тайёр маҳсулотни етказиб бермоқда ва
75 нафардан ортиқ хотин-қизларни иш билан таъминлади. Ойлик даромади
15-20 млн сўмни ташкил этмоқда.
Туманимиз хотин-қизлари қишлоқ-хўжалиги соҳасида ҳам фаол иштирок этмоқдалар. Жумладан, 2025 йилнинг якуни бўйича Деҳқончиликни ҳандалаги ҳисобланган пилла етиштириш учун
3 483 қути ипак қуртини парваришлаб, белгиланган режадаги 209 тонна пилла хомашёси хирмони яратилиб, режа
100 фоизга бажарилишида фидойи аёлларимизнинг меҳнатлари ётибди.
Ҳурматли тадбир иштирокчилари!
Албатта, бу каби муваффақиятлар замирида энг аввало Давлатимиз раҳбари томонидан сиз азиз аёлларга қаратилаётган катта эътибор, берилаётган имтиёз ва имкониятлар ётибди. Сизларни ўз номимдан, бутун халқимиз номидан яна бир бор чин юракдан табриклаб, келгуси ишларингизда улкан ютуқ ва омадлар тилайман.
Жонажон Ватанимизнинг янги юксалиш даврини барпо этишда азиз аёлларимиз доимо олдинги сафда бўладилар, деб ишонаман.
Сизларни бугунги қутлуғ байрам билан яна бир бор чин қалбимдан табриклайман.
Барчангизга сиҳат-саломатлик, хонадонларингизга тинчлик-омонлик, дунёдаги энг катта бойлик – оилавий бахт-саодат ёр бўлишини тилайман.