Инспекция бошлиғи мурожаати!
2025-04-08 11:40:00 / Раҳбариятнинг баёнотлари ва нутқлари
Ҳурматли ҳамкасблар !
Сўнгги йилларда мамлакатимизда коррупциянинг олдини олиш ва унга қарши курашиш, давлат ва жамият қурилишининг барча соҳаларида коррупциявий омилларга чек қўйишга қаратилган кенг кўламли ислоҳотлар изчил амалга оширилмоқда.
Давлатимизда коррупцияга қарши курашиш бўйича амалга оширилаётган ислоҳотлар натижалари халқаро ҳамжамият томонидан эътироф этилишида Ўзбекистон Республикаси Президентининг тегишли фармон ва қарорлари асосида коррупцияга қарши превентив механизмларни қўллаш устуворлик касб этаётганлиги ҳамда давлат органлари ва ташкилотлари фаолияти очиқлигини таъминлашга қаратилган аниқ чораларнинг белгилаб берилганлигини алоҳида эътироф этиш лозим.
Бунинг исботи сифатида 2024 йил якунлари бўйича Ўзбекистоннинг очиқлик бўйича халқаро рейтинглардаги ўрни 138 поғонага яхшиланиб, Марказий Осиёда биринчи, дунёда 30-ўринга кўтарилганлиги, Transparency International халқаро нодавлат-нотижорат ташкилотининг 2024 йил якунлари бўйича давлатимиз коррупцияга қарши курашиш рейтингида 180 давлат орасида 32 балл билан 121-ўринни эгаллаганини таъкидлаб этиш лозим.
Лекин шунинг билан бирга, коррупция оқибатида жаҳон иқтисодиёти йилига 3 триллион доллар зарар кўраётгани бу глобал хавф эканидан далолат эканлигини, у халқнинг давлатга, Конституция ва қонунларга ишончига путур етказишини, барқарор ривожланиш ва хавфсизлик учун жиддий таҳдидга айланишини эътибордан четда қолдириб бўлмайди.
Биргина жорий йилнинг март ойида “Коррупциянинг олдини олиш бўйича ишлар натижадорлиги ва келгусидаги устувор вазифалар”га бағишлаб ўтказилган Коррупцияга қарши курашиш бўйича Миллий кенгашнинг кенгайтирилган йиғилишини шахсан Ўзбекистон Республикаси Президенти раислигида ўтказилиши ҳамда мутасадди раҳбар ходимларга бир қатор муҳим вазифаларнинг қўйилиши мамлакатимизда соҳанинг давлат сиёсати даражасига кўтарилганлигининг яна бир яққол исботи эканлигини кўрсатади.
Маълумки, коррупцияга қарши самарали курашишда давлат ва жамият ҳаётининг барча соҳаларида коррупциянинг олдини олишга доир аниқ-чора тадбирларни белгилаш, коррупцияга оид ҳуқуқбузарликларни ўз вақтида аниқлаш, уларга чек қўйиш, коррупцияга имкон берувчи шарт-шароитларни бартараф этиш, ҳуқуқбузарликларни содир этганлиги учун жавобгарликнинг муқаррарлигини таъминлаш каби вазифаларни бажариш устувор ҳисобланади.
Тоғ-кон саноати ва гелогия соҳасини назорат қилиш инспекциясида юқоридаги каби чора-тадбирларни белгилаш ҳамда коррупцияга қарши курашиш механизмини такомиллаштириш мақсадида бир қатор ички меъёрий ҳужжатлар ва тартиб-қоидалар ишлаб чиқилди.
Хусусан, Инспекцияда «Коррупцияга қарши курашиш сиёсати», «Манфаатлар тўқнашувини бошқариш тўғрисида»ги низом, «Коррупциявий хавф-хатарларни баҳолаш услубиёти», Инспекция ходимларининг «Одоб-ахлоқ қоидалари» ва бошқа шу каби 15 га яқин ички идоравий ҳужжат қабул қилинди.
Шунингдек, Инспекция ходимларининг коррупцион ҳаракатлари юзасидан хабар беришга мўлжалланган алоқа каналлари ташкил этилиб, улар тўғрисидаги маълумотлар ташкилотнинг расмий веб-сайти ва ижтимоий тармоқ каналларида очиқ жойлаштирилди.
Коррупцияга қарши курашиш агентлиги ҳамда Тоғ-кон саноати ва гелогия соҳасини назорат қилиш инспекцияси ўртасидаги ўзаро ҳамкорлик тўғрисидаги меморандум, шунингдек, 2025 йилда ташкилотда коррупцияга қарши курашишда устувор вазифаларга оид чора-тадбирлар режаси тасдиқланиб, тизим ходимлари орасида коррупцияга қарши муросасиз муносабатни шакллантиришга оид бир қатор амалий ишлар қилинди.
Ўз навбатида, Тоғ-кон саноати ва геология соҳасини назорат қилиш инспекцияси коррупцион ҳаракатларнинг ҳар қандай шакл ва кўринишларини рад этади, Жамиятда коррупцияга нисбатан кескин муросасизлик шаклланишини таъминлайди, тизимда коррупциянинг олдини олиш ва унинг келиб чиқиш сабабларини бартараф этишга оид амалий ишларни олиб боради ҳамда қонун ҳужжатларига қатъий риоя қилишга, ҳалоллик, очиқлик ва шаффофликни таъминлашга алоҳида эътибор қаратади.
Ҳар биримиз бу ишда нафақат мамлакатимизда қабул қилинган қонунчилик ҳужжатларига онгли равишда риоя қилишимиз, балки бу ишга инсонийлик бурчимиз сифатида қарашимиз зарур.
Фурсатдан фойдаланиб, ҳамкасбларимиз ва юртдошларимизни иш юритиш стандартларига амал қилишга, коррупцияга қарши мавжуд қонунчилик нормаларига оғишмай риоя этишга, ҳар қандай коррупцион, манфаатлар тўқнашуви ва қонунбузилиш ҳолатлари ҳақида ўз вақтида тезкорлик билан хабар беришда ҳамжиҳатликка чақираман.
Ҳурмат билан,
Тоғ-кон саноати ва геология соҳасини
назорат қилиш инспекцияси бошлиғи