«Ўзбеккўмир» АЖ корхоналарида ёнғин хавфсизлиги бўйича ўқув машғулоти ўтказилди
2026-11-04 10:25:00 / Янгиликлар
«Ўзбеккўмир» акциядорлик жамияти тизимидаги корхоналарда ёнғин хавфсизлигини таъминлаш ва фавқулодда вазиятларга тайёргарликни ошириш мақсадида махсус-тактик ўқув машғулоти ташкил этилди. Тадбирга 11 та махсус техника ва 62 нафар ходим жалб қилинди.
Ўзбекистон Республикаси Вазирлар Маҳкамасининг тегишли топшириғи асосида мамлакат бўйлаб ўтказилаётган «Ёнғин хавфсизлиги ойлиги» доирасида корхона ва ташкилотларда, шунингдек, аҳоли ўртасида профилактик тадбирлар, давра суҳбатлари ҳамда амалий машғулотлар ташкил этилмоқда.
Шу муносабат билан «Ўзбеккўмир» АЖ тизимидаги корхоналарда ишчи-ходимларнинг фавқулодда вазиятларда тўғри ҳаракат қилиш кўникмаларини мустаҳкамлаш, ёнғин содир бўлганда тезкор чоралар кўриш ҳамда қутқарув тузилмаларининг ўзаро ҳамкорлигини мувофиқлаштиришга қаратилган махсус-тактик машғулот ўтказилди.
Машғулотда жамият тизимидаги корхоналарнинг масъул ходимлари, Фавқулодда вазиятлар бошқармасининг Ангрен шаҳар бўлими мутахассислари ҳамда 2-алоҳида ҳарбийлаштирилган кон қутқарув взводи шахсий таркиби иштирок этди.
Амалий машғулот давомида бинода шартли ёнғин юзага келган вазият моделлаштирилди. Иштирокчилар ёнғин ўчоғини аниқлаш, унинг тарқалишини чеклаш, бинодаги одамларни хавфсиз ҳудудга эвакуация қилиш ва жабрланганларга биринчи ёрдам кўрсатиш бўйича тактик ҳаракатларни бажардилар.
Шунингдек, фавқулодда вазият ҳақида тезкор хабар бериш, масъул хизматлар ўртасида ахборот алмашиш ҳамда қутқарув кучларининг ҳамкорликдаги ҳаракатларини мувофиқлаштириш масалаларига эътибор қаратилди.
Тадбирга жами 11 та махсус техника ва 62 нафар ходим жалб этилгани ёнғин хавфсизлигини таъминлашда турли хизматларнинг ҳамкорликдаги ҳаракатларини амалий шароитда машқ қилиш имконини берди.
Бундай машғулотлар кончилик корхоналарида фавқулодда вазиятларга тайёргарликни ошириш, ходимларнинг ҳаракатларини мувофиқлаштириш ва эҳтимолий хавфларнинг оқибатларини камайтиришга хизмат қилади.
Ёнғин хавфсизлиги талабларига риоя этилиши, профилактик тадбирларнинг мунтазам ўтказилиши ва қутқарув тузилмаларининг тайёргарлиги ишлаб чиқариш жараёнларининг узлуксизлиги ҳамда ходимлар ҳаёти ва соғлиғини муҳофаза қилишда муҳим аҳамиятга эга.