“Ўзбеккўмир” АЖ журналист ва блогерларни Ангрен кўмир конидаги иш жараёнлари билан таништирди
2026-09-28 11:05:00 / Янгиликлар
“Ўзбеккўмир” АЖ томонидан журналист ва блогерлар учун “Ангрен кўмир кони” филиалига пресс-тур ташкил этилди. Унда кўмир саноатида бозор механизмларини жорий этиш доирасидаги янги тартиб, аҳоли эҳтиёжлари учун кўмир етказиб бериш тизими, Жамиятнинг ишлаб чиқариш салоҳияти ва 2026-йилдаги режалар ижроси ҳақида маълумот берилди.
Пресс-тур “Ангрен кўмир кони” филиалининг Марказий диспетчерлик марказида ўтказилган матбуот анжумани билан бошланди. Унда “Ўзбеккўмир” АЖ бош директорининг биринчи ўринбосари Э. Якубов соҳада амалга оширилаётган ўзгаришлар ва Жамият олдидаги вазифалар ҳақида сўз юритди.
Таъкидланганидек, кўмир саноатида бозор механизмларини жорий этиш бўйича янги тартиб Ўзбекистон Республикаси Вазирлар Маҳкамасининг 2026-йил 30-июлдаги 418-сон қарори асосида амалга оширилмоқда. Тизим аҳоли учун ажратиладиган кўмирни ҳудудлар кесимида тақсимлаш, маҳсулотни биржа савдоларига чиқариш, хусусий тадбиркорлар орқали етказиб бериш ҳамда сотув жараёнларини рақамли платформа орқали очиқ ташкил этишни назарда тутади.
2026-йилда аҳоли эҳтиёжлари учун 1 миллион 530 минг тонна маҳаллий кўмир етказиб бериш режалаштирилган. Ҳозир Андижон, Фарғона ва Наманган вилоятлари аҳолиси учун биржа савдоларига чиқарилган кўмирнинг дастлабки партиялари хусусий тадбиркорлар томонидан харид қилинган. Шартномаларни расмийлаштириш ва маҳсулотни ҳудудларга етказиб бериш давом этмоқда.
Жамият 2026-йилда 5,8 миллион тонна кўмир қазиб олишни режалаштирган. Дастлабки саккиз ойда 3,7 миллион тонна кўмир қазиб олиниб, истеъмолчиларга шунча миқдорда маҳсулот етказиб берилган. Ҳозир корхоналарда бир суткада ўртача 25 минг тонна қаттиқ ёқилғи қазиб олинмоқда.
“Ўзбеккўмир” АЖ тизимида 8 та филиал бўлиб, уларнинг 3 таси бевосита кўмир қазиб чиқариш билан шуғулланади. Тизимда 6 минг нафарга яқин ходим меҳнат қилмоқда. Ишлаб чиқариш билан бир қаторда устки қатламларни очиш, иш жараёнларини такомиллаштириш ва маҳсулот сифатини яхшилаш бўйича ишлар олиб борилмоқда.
“Ангрен” кўмир ҳавзасидаги кон 1948-йилда фойдаланишга топширилган. Дастлаб унинг йиллик қуввати 1,5 миллион тонна бўлган. Кейинги реконструкция ва модернизация ишлари натижасида ишлаб чиқариш қуввати қарийб тўрт бараварга оширилган.
Пресс-тур давомида ОАВ вакиллари кон ҳудудига тушиб, кўмирни қазиб олиш, саралаш ва юклаш жараёнлари, шунингдек, оғир кон техникасининг ишлашини бевосита кузатдилар. Мутахассислар билан суҳбатларда қазиб олиш технологиялари, замонавий техникадан фойдаланиш ва ишлаб чиқариш режалари юзасидан қўшимча маълумотлар олинди.
Пресс-турда тақдим этилган кўрсаткичлар “Ўзбеккўмир” АЖда ишлаб чиқариш ҳажмларини ошириш билан бирга кўмирни аҳолига етказиб бериш механизмларини ҳам янгилаш жараёни давом этаётганини кўрсатади. Жараёнларни рақамлаштириш ва биржа савдоларининг жорий этилиши маҳсулот ҳаракати ҳамда сотув босқичларида очиқликни оширишга хизмат қилиши кўзда тутилган.