Давлат бошқарувини бюрократиядан холи қилиш: “Бюрократиясиз Ўзбекистон” фуқаролик ташаббуси бошланди
2026-09-21 10:45:00 / Янгиликлар
Ўзбекистон Республикаси Президентининг 2025 йил 28 ноябрдаги Ф-68-сон Фармойиши билан маъқулланган “Бюрократияни бартараф этиш – 2030” дастури доирасида “Бюрократиясиз Ўзбекистон” номли кенг кўламли фуқаролик ташаббусига старт берилди. Мазкур лойиҳа давлат органлари фаолиятидаги ортиқча маъмурий ғовларни ва такрорланувчи амалиётларни бартараф этишга қаратилган.
Ушбу ташаббус фуқаролар ҳамда тадбиркорлик субъектларининг кунлик фаолиятида дуч келаётган бюрократик тўсиқларини ўрганиш ва уларга барҳам беришни кўзда тутади. Шу орқали аҳолининг давлат хизматларидан фойдаланиш жараёни енгиллаштирилиб, маъмурий тартиб-таомиллар соддалаштирилади.
Аҳоли ва тадбиркорлар 2026 йилнинг 21 сентябридан 20 ноябрига қадар murojaat.byurokratiyasiz2030.uz махсус электрон платформаси орқали амалий таклифларини юборишлари мумкин. Юборилаётган мурожаатларда муаммонинг аниқ мазмуни, у келтириб чиқараётган вақт ҳамда ресурс йўқотишлари, шунингдек, уни ҳал этиш бўйича муқобил ечимлар кўрсатилиши лозим.
Келиб тушган таклифлар соҳа мутахассислари ҳамда экспертлар томонидан атрофлича баҳоланади. Маъқулланган таклифлар асосида амалдаги норматив-ҳуқуқий ҳужжатларга тегишли ўзгартиришлар киритилади ҳамда рақамлаштириш чора-тадбирлари белгилаб олинади. Энг муҳим ташаббуслар “Бюрократияни бартараф этиш – 2030” дастурининг йиллик ҳаракатлар режасига киритилади.
Тўпланган амалий таклифлар давлат идоралари кесимида энг кўп бюрократик тўсиқлар мавжуд бўлган соҳалар харитасини шакллантириш имконини беради. Бу эса келгусида давлат хизматларини кўрсатиш муддатларини қисқартириш ва ортиқча харажатларни камайтиришга хизмат қилади. Барча босқичлар ҳамда статистик маълумотлар платформада реал вақт режимида очиқ эълон қилиб борилади.
Ташаббуснинг амалга оширилиши давлат бошқаруви аппарати фаолиятининг очиқлиги ва самарадорлигини оширишга амалий замин яратади. Аҳоли ва бизнес вакилларининг бевосита иштироки орқали бошқарувдаги мавжуд камчиликлар тезкор аниқланиб, тизимли равишда ҳал этилади.
Натижада, ортиқча маъмурий харажатлар ва вақт сарфи кескин қисқариб, мамлакатда тадбиркорлик муҳитининг янада яхшиланишига ҳамда иқтисодий жараёнлар жадаллашувига эришилади.