Олмалиқда саноат хавфсизлиги, манфаатлар тўқнашуви ва киберхавфсизлик масалалари муҳокама қилинди
2026-09-02 15:30:00 / Янгиликлар
Тоғ-кон саноати ва геология соҳаси устидан назорат қилиш инспекциясининг Олмалиқ кон-техника инспекциясида саноат хавфсизлиги, коррупциянинг олдини олиш ҳамда киберхавфсизлик масалаларига бағишланган йиғилиш бўлиб ўтди. Марказий аппарат масъуллари ҳамда инспекциянинг 10 нафар ходими иштирок этган ушбу мулоқотда объектларда қонунийликни таъминлаш ва хавфларнинг олдини олиш масалалари атрофлича кўриб чиқилди.
Йиғилишда Ўзбекистон Республикаси Президентининг 2026 йил 1 апрелдаги ПҚ-120-сонли қарорига мувофиқ, «Олмалиқ КМК» АЖ ва назорат остидаги барча объектларда ёнғин ҳамда саноат хавфсизлиги қоидаларига қатъий риоя этиш лозимлиги таъкидланди. Объектларда бахтсиз ҳодисалар ҳамда фавқулодда ҳолатларнинг олдини олиш бўйича амалга оширилган чора-тадбирлар таҳлил қилинди.
Мулоқот давомида «Коррупцияга қарши курашиш тўғрисида»ги Қонун ижросига тўхталиб ўтилди. Айниқса, давлат хизматчисининг шахсий манфаатдорлиги хизмат вазифасини холис бажаришига таъсир кўрсатиши мумкин бўлган ҳолатларда манфаатлар тўқнашувини ўз вақтида аниқлаш, маълум қилиш ва зудлик билан бартараф этиш шартлиги уқтирилди.
Шу билан бирга, замонавий кибертаҳдидлар ва фирибгарлик схемалари хавфи алоҳида муҳокама қилинди. Сохта қўнғироқлар, раҳбарлар номидан очилган сунъий аккаунтлар ҳамда фейк ҳаволалар орқали шахсий ва банк маълумотларини эгаллаб олиш ҳолатларига қарши ҳушёрликни ошириш бўйича тушунтиришлар берилди. Ходимларга SMS-кодлар ва Telegram тасдиқлаш кодларини учинчи шахсларга бериш қатъиян ман этилиши еслатилди.
Ушбу профилактик тадбирлар давлат назорати тизимида очиқлик, ҳалоллик ва шаффофликни таъминлашга хизмат қилади. Манфаатлар тўқнашувининг олдини олиш ва киберхавфсизликни мустаҳкамлаш еса саноат объектларининг хавфсиз ҳамда барқарор ишлаши учун муҳим пойдевор ҳисобланади.