Ҳарбийлаштирилган кон қуткарув қисми Ўзбекистон очиқ чемпионатида муносиб иштирок этмоқда
2026-08-07 15:25:00 / Янгиликлар
Наманган шаҳрида ёнғин-қутқарув спорти бўйича эркаклар ўртасидаги Ўзбекистон Республикаси очиқ чемпионатига старт берилди. Мазкур нуфузли мусобақада Ҳарбийлаштирилган кон куткарув қисми (ХКҚҚ) терма жамоаси ҳам фаол қатнашиб, юқори касбий тайёргарлик ва маҳорат намойиш этмоқда.
Чемпионатнинг илк кунида спортчилар ишғол қилиш нарвони орқали ўқув минорасининг 4-қаватига кўтарилиш бўйича куч синашдилар. Бегиланган низомга мувофиқ, ҳар бир жамоа аъзосига ўз кўрсаткичларини яхшилаш ва энг юқори натижани қайд этиш учун 2 маротаба уриниш имконияти берилди. ХКҚҚ терма жамоаси аъзолари биринчи босқичданоқ чаққонлик ва аниқ ҳаракатлар эвазига пешқадамлар сафидан жой олишди.
Куннинг иккинчи ярмида эса мусобақанинг навбатдаги қизиқарли шарти — ёнғин ўчирувчилар ва қутқарувчилар эстафетаси баҳслари ўтказилиши режалаштирилган. Айни пайтда терма жамоа вакиллари ушбу босқичда ҳам юқори натижаларни қўлга киритиш мақсадида қизғин тайёргарлик машқларини олиб бормоқда.
Спорт мусобақаларида эришилаётган бундай юқори кўрсаткичлар Харбийлаштирилган кон куткарув қисми шахсий таркибининг жисмоний ва касбий тайёргарлик даражаси доимий равишда ошиб бораётганини кўрсатади. Бу эса фавқулодда вазиятлар ҳамда кон-қутқарув ишларида хавфсизликни ишончли таъминлаш ва тезкор чоралар кўриш имконини беради.