Ўзбекистон Республикаси Тоғ-кон саноати ва геология вазирлиги ҳузуридаги Тоғ-кон саноати ва геология соҳасини назорат қилиш инспекцияси

Ўзбекистон Республикаси Вазирлар Маҳкамасининг 2026 йил 9 июлдаги 376-сон қарори билан мамлакатимиздаги айрим тоғ тизмалари, тоғлар, чўққилар, даралар, довонлар ва ғорларнинг номларини давлат тили қоида ва меъёрларига мувофиқлаштириш ҳамда уларга янги ном бериш рўйхати тасдиқланди. Ҳужжат Ўзбекистон Республикасининг “Давлат тили ҳақида”ги ва “Географик объектларнинг номлари тўғрисида”ги қонунларига мувофиқ қабул қилинди.

Ҳужжатга кўра, республика бўйича жами 124 та географик объектнинг номи ўзгартирилди ёки имлоси тўғриланди. Улардан 117 таси тоғ тизмаси, тоғ, чўққи ва довонлар бўлса, қолганлари дара ва ғорлардир. Ҳудудлар кесимида Андижонда 1 та, Бухорода 12 та, Фарғонада 10 та, Жиззахда 54 та, Наманганда 5 та, Навоийда 12 та, Қашқадарёда 11 та, Самарқандда 6 та, Сурхондарёда 4 та ва Тошкент вилоятида 8 та объект номи мувофиқлаштирилди.

Ислоҳотлар натижасида рус ва бошқа тиллар таъсирида нотўғри ёзилиб келинган номлар лотин ёзувига асосланган ўзбек алифбоси меъёрларига келтирилди. Масалан, Бухородаги “Каратаг” тоғи Қоратоғ, Жиззахдаги “Кызылтурук” тоғ тизмаси Қизилўриқ, Навоийдаги “Арыстантау” тизмаси Арслонтов, Қашқадарёдаги “пещера Тамерлана” ғори эса Амир Темур ғори деб қайта номланди. Номлар эндиликда норматив-ҳуқуқий ҳужжатлар, хариталар ва иш юритишда мажбурий тартибда қўлланилади.

Экология ва иқлим ўзгариши миллий қўмитаси, Кадастр агентлиги ҳамда Туризм қўмитаси билан биргаликда икки ой муддатда хариталар ва маълумотлар базаларига ўзгартиришлар киритади. Қорақалпоғистон Республикаси Вазирлар Кенгаши ва вилоятлар ҳокимликлари жойлардаги пешлавҳа ҳамда кўрсаткичларнинг ўзбек тилида ёзилишини таъминлайди.

Географик номларнинг давлат тили меъёрларига келтирилиши миллий ўзликни англаш ва қонун устуворлигини таъминлаш йўлидаги муҳим қадамдир. Ҳудудий номларнинг тартибга солиниши туризм салоҳиятини ошириш, кадастр тизимини аниқ юритиш ҳамда давлат органларининг иш юритиш самарадорлигини оширишга хизмат қилади.