Когон шаҳрида Кореянинг “КП Глобал” компанияси ва маҳаллий ҳамкор иштирокида ташкил этилган “Мастер Инноватион” қўшма корхонаси томонидан бетон учун пластификатор ишлаб чиқаришга ихтисослашган янги лойиҳа амалга оширилмоқда.
2026-02-05 11:55:00 / Янгиликлар
Мазкур корхона “Бухоро саноатни ривожлантириш комплекси” махсус саноат парки ҳудудида жойлашган бўлиб, лойиҳа тўғридан-тўғри хорижий инвестициялар ҳисобига амалга оширилмоқда. Инвестиция лойиҳасининг умумий қиймати 5 миллион АҚШ долларини ташкил этади.
Лойиҳага кўра, замонавий технологиялар асосида бетон пластификаторлари ишлаб чиқаришни ташкил этиш режалаштирилган. Ушбу маҳсулотлар бетоннинг мустаҳкамлиги, технологик хусусиятлари ва эксплуатацион сифатларини яхшилашда қўлланилади. Ишлаб чиқариладиган маҳсулотлар уй-жой қурилиши, инфратузилма ва саноат обектларида фойдаланишга мўлжалланган.
Корхона фаолияти маҳаллий бозор эҳтиёжларини қондириш, импорт ўрнини босиш, қурилиш материаллари соҳасида саноат кооперациясини ривожлантириш ҳамда келгусида экспорт ҳажмини кенгайтиришга қаратилган.
Янги корхонанинг очилиши натижасида ҳудудда янги иш ўринлари яратилади, саноат салоҳияти ошади ҳамда Бухоро вилоятининг инвестициявий жозибадорлиги янада мустаҳкамланади.