Пиллакорларларнинг баҳорги хирмонлари тўлмоқда
2025-05-22 19:40:00 / Янгиликлар
Хонадонларда ипак қурти боқиб, пилла етиштириш азалдан халқимизнинг асосий меҳнат машғулоти, даромад манбаидан бири бўлиб келган. Ҳозирги кунда юртимиз пилла етиштириш ва ипак толаси ишлаб чиқариш бўйича дунёда Хитой ва Ҳиндистондан кейин учинчи ўринда туради.
Бугун ота-боболаридан қолган ана шу анъанани иштиёқ билан давом эттирувчилар сони ортиб бораётгани бежиз эмас. Боиси, сўнгги йилларда юртимизда ипакчилик ва пиллачилик тармоғини ривожлантиришга эътибор ортмоқда. Натижада тармоқда аҳолини иш билан таъминлаш ҳамда сифатли пилла етиштириш кўрсаткичи йилдан-йилга ўсиб боряпти.
Хусусан, Касби тумани Оққамиш маҳалласида истиқомат қилаётган Шоҳиста Нормўминова 27 йилдирги ўз хонадонида ипак қурти парваришлаб, давлатга пилла етиштириб бериш билан бир қаторда ўз маҳалласидаги бир нечта хотин-қизларни ҳам иш билан банд қилиб келмоқда.
— "Пилла етиштириш сир-асрорларини қайнонамдан ўрганганман. Ушбу меҳнатимиздан фахрланамиз, қўни-қўшни аёллар билан биргаликда тайёр бўлган пиллани териб олаяпмиз. Меҳнатимиз ортидан фарзандларимизни ўқитяпмиз, тўйлар қиляпмиз. Мавсум аввалида 12 қути ипак қурти олган эдик, шундан 1 тонна тайёр пиллани давлатимиз хирмонига топширишни режа қилиб турибмиз," — дейди Шоҳиста Нормўминова.
Пиллачилик мамлакат иқтисодиётида ҳам катта аҳамият касб этади. Шу сабабли ҳам мамлакатимизда пиллачиликни ривожлантиришга давлат томонидан катта эътибор қаратилмоқда. Пиллани қайта ишлаш соҳасида кўплаб янгиликлар жорий этилиб, бу ўз навбатида маҳсулотларнинг халқаро бозорларда рақобатбардошлигини оширишга хизмат қилмоқда.