Касби тумани ҳокими Тўхтамурод Мейлиевнинг туманда 2026-йилнинг 10 ойи давомида фуқаролар мурожаатлари билан ишлаш борасида амалга оширилган ишлар ва эришилган натижалар юзасидан брифинги
2026-11-06 15:00:00 / Раҳбариятнинг баёнотлари ва нутқлари

Энди эътиборингизни 2026-йилнинг ўтган 10 ойи давомида туманда фуқаролар мурожаатлари билан ишлаш борасида эришилган натижалар ва мавжуд ҳолатга қаратмоқчиман.
Ҳисобот даврида Ўзбекистон Республикаси Президентининг Касби туманидаги Халқ қабулхонасига жисмоний ва юридик шахслардан жами 3 793 та мурожаат келиб тушган. Бу ўтган йилнинг шу даврига нисбатан 311 тага ёки 8,9 фоизга кўпдир.
Албатта, мурожаатлар сонининг ортишига фақат рақамлар нуқтаи назаридан қараш тўғри эмас. Ҳар бир мурожаат ортида муайян инсоннинг ҳаётий муаммоси, оиласининг ташвиши ёки ҳал этилиши зарур бўлган масала турибди. Шунинг учун биз учун асосий вазифа мурожаатларнинг сонини камайтириш эмас, балки уларда кўтарилган муаммоларга ўз вақтида ва қонуний ечим топишдан иборат.
Ҳисобот даврида келиб тушган мурожаатларнинг мазмун-моҳияти ўрганилиб, уларнинг келиб чиқиш сабаблари таҳлил қилинди. Муаммоларни ҳал этишда туман ташкилотлари ва тегишли идоралар билан ҳамкорлик йўлга қўйилиб, ҳар бир масала бўйича амалий чоралар кўрилди.
Ҳурматли журналистлар!
Фуқаролар мурожаатларини кўриб чиқишда шахсий ва сайёр қабуллар алоҳида аҳамият касб этмоқда.
Энди мурожаатларни кўриб чиқиш натижаларига аниқ рақамлар мисолида тўхталиб ўтсам.
2026-йилнинг ўтган 10 ойи давомида келиб тушган 3 793 та мурожаатнинг 3 434 таси кўриб чиқилган бўлиб, уларнинг 3 145 таси қаноатлантирилган. Жумладан, 1 095 та мурожаатда кўтарилган масалалар амалий жиҳатдан ижобий ҳал этилган, 2 108 та мурожаат бўйича эса фуқароларга амалдаги қонунчилик талаблари асосида ҳуқуқий маълумотлар берилиши орқали масалалар ҳал этилган.
Ҳисобот даври якунига қадар келиб тушган мурожаатларнинг 359 таси кўриб чиқиш жараёнида, шунингдек, 30 та мурожаат узоқ муддатли назоратга олинган бўлиб, 201 та фуқарога тушунтириш берилган.
Ушбу натижалар мурожаатлар билан ишлашда ҳар бир масалага алоҳида ёндашилаётгани, фуқароларнинг талаб ва эҳтиёжларини ўрганиш ҳамда уларнинг қонуний ечимини таъминлашга эътибор қаратилаётганини кўрсатади.
Туман ҳокими ва унинг ўринбосарлари томонидан ташкил этилаётган шахсий ва сайёр қабуллар орқали аҳоли муаммолари бевосита жойига чиққан ҳолда ўрганилмоқда. Қабулларда тегишли ташкилотлар раҳбарлари ва масъул ходимларнинг иштирок этиши таъминланиб, мурожаатларнинг имкони борича шу ернинг ўзида ҳал этилишига эътибор қаратилмоқда.
Бундай мулоқотлар фуқароларни турли идораларга қайта-қайта мурожаат қилишдан халос этиш, уларнинг вақт ва маблағини тежаш, шунингдек, раҳбарларнинг аҳоли олдидаги масъулиятини оширишга хизмат қилмоқда.
Айниқса, аҳоли томонидан кўп кўтарилаётган ички йўлларни асфальтлаш ва шағаллаштириш, ичимлик суви таъминотини яхшилаш, янги сув қувурларини тортиш, электр тармоқларини таъмирлаш, янги симёғочлар ўрнатиш ва электр симларини янгилаш каби масалаларни ҳал этишга алоҳида эътибор қаратилди.
Натижада бир қатор маҳаллаларда йиллар давомида ечимини кутаётган инфратузилма муаммолари босқичма-босқич бартараф этилди. Бу эса, ўз навбатида, аҳолининг кундалик турмуш шароитини яхшилаш, яшаш манзилларида қулайлик яратиш ва мавжуд инфратузилмадан фойдаланиш имкониятларини кенгайтиришга хизмат қилди.
Мурожаатлар билан ишлаш самарадорлигини баҳолашда уларнинг йўналишлар кесимидаги таҳлили ҳам муҳим ўрин тутади.
2026-йилнинг 10 ойи давомида ўтган йилнинг мос даврига нисбатан бир қатор йўналишларда мурожаатлар сони камайгани кузатилди.
Жумладан:
- иш билан таъминлаш масаласидаги мурожаатлар 40,8 фоизга;
- уй-жойни таъмирлаш ва қуриш учун ёрдам сўраб қилинган мурожаатлар 48,4 фоизга;
- электр ҳисоблагичлари билан боғлиқ мурожаатлар 42,1 фоизга;
- электр тармоқларини қуриш ва таъмирлаш бўйича мурожаатлар 24,2 фоизга;
- ички йўлларни таъмирлаш бўйича мурожаатлар эса 23,3 фоизга камайган.
Ушбу кўрсаткичлар мазкур йўналишларда муаммоларни манзилли ўрганиш, масъул ташкилотлар билан ҳамкорликда амалга оширилган ишлар ва кўрилган чора-тадбирларнинг натижасини ифодалайди.
Бироқ бу рақамларни барча муаммолар тўлиқ ҳал этилди, деган маънода қабул қилмаслик керак. Ҳар бир камайган кўрсаткич ортида амалий иш, ҳар бир ҳал этилган мурожаат ортида эса фуқаронинг қаноатланиши туриши лозим.
Шу билан бирга, таҳлиллар айрим йўналишларда мурожаатлар сони ортиб бораётганини ҳам кўрсатмоқда. Хусусан, болалар нафақаси, газ баллонларини тўлдириш, алимент ундириш ва маиший чиқиндиларни ўз вақтида олиб чиқиб кетиш масалалари бўйича мурожаатлар кўпайган.
Бу эса ушбу соҳаларда ҳали ечимини кутаётган муаммолар мавжудлигини, масъул ташкилотлар фаолиятини янада кучайтириш, мурожаатларни келтириб чиқараётган сабабларни чуқур ўрганиш ва тизимли чоралар кўриш зарурлигини англатади.
Айниқса, ижтимоий ҳимояга муҳтож оилалар, болалар нафақасига эҳтиёжи бўлган фуқаролар, алимент ундириш билан боғлиқ муаммоларга дуч келаётган шахсларнинг мурожаатларига бефарқ қараш мумкин эмас. Бу борада масъул идоралар фақат мурожаат келиб тушгандан кейин эмас, балки муаммонинг олдини олиш нуқтаи назаридан ҳам иш олиб бориши зарур.
Ҳурматли оммавий ахборот воситалари ходимлари!
Мурожаатлар билан ишлашда қонунийликни таъминлаш, фуқароларнинг ҳуқуқ ва қонуний манфаатларини ҳимоя қилиш, шунингдек, масъул ташкилотлар фаолияти устидан таъсирчан назорат ўрнатиш масаласи ҳам доимий эътиборимизда.
Ҳисобот даврида мурожаатларни кўриб чиқиш жараёнида аниқланган қонунбузилишлар, фуқароларнинг ҳуқуқлари ва қонуний манфаатлари бузилиши, айрим ташкилотларда мурожаатлар билан ишлашда йўл қўйилган камчиликлар юзасидан прокуратура ва адлия органларига, шунингдек, Халқ депутатлари туман Кенгашига тегишли ахборотлар, таклиф ва тақдимномалар киритилди.
Шу билан бирга, фуқаролар мурожаатларига сансоларлик билан ёндашиш, уларни кўриб чиқиш муддатларини бузиш, муаммоларни юзаки ўрганиш ва масъулиятсизликка йўл қўйиш ҳолатлари бўйича айрим ташкилот раҳбарлари ҳамда масъул ходимларга нисбатан белгиланган тартибда таъсир чоралари кўрилиши таъминланди.
Бизнинг қатъий талабимиз шуки, бирорта мурожаат эътиборсиз қолмаслиги, фуқаро идорама-идора сарсон бўлмаслиги, ҳар бир масалага қонунчилик талаблари ва инсон манфаатлари нуқтаи назаридан ёндашилиши шарт.
Олдимизда турган асосий вазифалардан бири — мурожаатлар билан ишлаш тизимини янада такомиллаштириш, мавжуд муаммоларни фақат оқибати бўйича эмас, балки уларни келтириб чиқараётган сабаблар нуқтаи назаридан бартараф этишдир.
Шу мақсадда келгуси даврда қуйидаги йўналишларга алоҳида эътибор қаратамиз:
Биринчидан, аҳоли мурожаатларида кўп кўтарилаётган масалалар бўйича манзилли ишларни кучайтириб, муаммоларнинг такрорланишига сабаб бўлаётган омилларни бартараф этиш.
Иккинчидан, болалар нафақаси, газ баллонлари таъминоти, алимент ундириш ва чиқиндиларни олиб чиқиб кетиш каби мурожаатлар кўпайган йўналишларда масъул ташкилотлар раҳбарларининг шахсий масъулиятини ошириш.
Учинчидан, шахсий ва сайёр қабулларнинг самарадорлигини янада кучайтириш, фуқаролар томонидан кўтарилган масалаларни жойида ўрганиш ва ижобий ҳал этиш чораларини кўриш.
Тўртинчидан, ҳар бир мурожаатнинг кўриб чиқилиши ва ижроси устидан қатъий назорат ўрнатиш, фуқароларга қабул қилинган қарорлар ва амалга оширилган ишлар юзасидан ўз вақтида ахборот бериш.
Бешинчидан, туман ташкилотлари раҳбарларининг аҳоли билан мулоқотини кучайтириш, мурожаатлар билан ишлашда расмиятчилик ва бепарволикка йўл қўймаслик.
Ҳурматли оммавий ахборот воситалари вакиллари!
Якуний хулоса сифатида таъкидлашни истардимки, фуқаролар мурожаатлари билан ишлаш — бу шунчаки келиб тушган ариза ва шикоятларга жавоб бериш эмас. Бу, энг аввало, инсон манфаатларини таъминлаш, аҳоли ишончини мустаҳкамлаш ва ҳудуддаги мавжуд муаммоларни аниқлаб, уларга амалий ечим топиш жараёнидир.
2026-йилнинг ўтган 10 ойи давомида Касби туманида бу борада муайян ишлар амалга оширилди, бир қатор йўналишларда ижобий натижаларга эришилди. Шу билан бирга, мурожаатлар таҳлили ҳали ечимини кутаётган масалалар ҳам мавжудлигини кўрсатмоқда.
Биз бу борадаги ишларни изчил давом эттирамиз. Чунки фуқаро мурожаат билан келганида унинг муаммосини эшитишгина эмас, балки имконият доирасида қонуний ечимини таъминлаш ҳар бир раҳбарнинг асосий вазифаси бўлиши керак.
Эътиборингиз учун раҳмат!
