Ўзбекистон ва Ўмон ўртасида маҳаллий контент ва давлат харидлари соҳасидаги ҳамкорлик истиқболлари муҳокама қилинди
2026-11-16 10:10:00 / Янгиликлар

Учрашувда икки мамлакат ўртасида саноат кооперациясини ривожлантириш, давлат харидлари тизимини такомиллаштириш ҳамда маҳаллий ишлаб чиқарувчиларни қўллаб-қувватлаш йўналишларида ҳамкорликни кенгайтириш масалалари муҳокама қилинди.
Хусусан, маҳаллий контент улушини ошириш, давлат харидларида маҳаллий ишлаб чиқарувчилар иштирокини кенгайтириш, илғор тажрибалар алмашиш ва икки ташкилот ўртасида институционал ҳамкорликни йўлга қўйиш истиқболлари кўриб чиқилди.
Шунингдек, PTLCA билан имзоланиши режалаштирилган ўзаро англашув меморандуми, ҳамкорликнинг устувор йўналишларини белгилаш ҳамда Агентлик фаолиятига халқаро экспертларни жалб этиш масалаларига алоҳида эътибор қаратилди.
Учрашув якунида томонлар белгиланган йўналишлар бўйича амалий ҳамкорликни ривожлантириш ва ўзаро тажриба алмашишни давом эттиришга тайёр эканликларини билдирди.
Шу куни Агентлик директори Ўзбекистон–Ўмон бизнес-форуми ҳамда мамлакатимизнинг иқтисодий, инвестициявий ва саноат салоҳиятига бағишланган кўргазмада ҳам иштирок этди. Тадбирлар икки мамлакатнинг йирик компаниялари ва ишбилармон доираларидан 150 нафардан ортиқ вакилни бир майдонда жамлади.
Форум доирасида ўзаро савдони кенгайтириш, инвестицияларни жалб этиш ва саноат кооперациясини ривожлантириш имкониятлари муҳокама қилинди. B2B ва G2B форматидаги учрашувлар ўтказилиб, энергетика, саноат, транспорт ва логистика, молия, қишлоқ хўжалиги ҳамда технологиялар йўналишларида қатор ҳужжатлар имзоланди.



