Саноат кооперацияси ва давлат харидлари тизимини ривожлантиришда халқаро ҳамкорлик масалалари муҳокама қилинди
2026-07-30 14:30:00 / Янгиликлар
Тадбирда халқаро молия институтлари ва ташкилотлари, хорижий экспертлар, хорижий давлатларнинг Ўзбекистондаги ваколатхоналарининг вакиллари ҳамда халқаро консалтинг компаниялари мутахассислари иштирок этди.
Давра суҳбатида Саноат кооперацияси ва давлат харидлари агентлигининг жорий йил биринчи ярим йиллигида халқаро ҳамкорлик ҳамда илмий-ишлаб чиқариш йўналишларида амалга оширилган ишлар, эришилган натижалар ва истиқболдаги вазифалар тақдим этилди.
Таъкидланганидек, ҳисобот даврида Агентлик томонидан Жаҳон банки, Осиё тараққиёт банки, Ислом тараққиёт банки ҳамда бошқа халқаро молия институтлари ва ташкилотлари билан 30 дан ортиқ учрашувлар ташкил этилди. Шунингдек, Korea Elevator University, Korea Elevator Safety Foundation, KPMG, UNDP билан ўзаро ҳамкорлик меморандумлари имзоланди.
Шу билан бирга, давлат харидлари, маҳаллий қиймат, хизматларни маҳаллийлаштириш ва саноат кооперацияси соҳаларида Агентлик томонидан олиб борилаётган ислоҳотларда халқаро тажриба, билим, ноу-ҳау ва тажрибани қўллаш учун ўзаро ҳамкорлик қилиш мумкин бўлган йўналишлар ҳақида ўзаро фикр алмашилди.
Тадбирда илмий-ишлаб чиқариш ҳамкорлиги, айнирса мактаб-олий таълим-фан-ишлаб чиқариш занжирини ўзаро боғлаш, бунда илмий ишланмаларни тижоратлаштириш каби долзарб масала юзасидан ҳам ўзаро фикр алмашилди.
Халқаро молия институтларидан ОТБ ва Жаҳон банки, халқаро йирик консалтинг компанияларидан KPMG, E&Y ва McKinsey, шунингдек UNDP вакиллари сўзга чиқиб Агентлик бошланган ислоҳотларда уларнинг иштироки, жумладан давлат харидларини янада шаффоф ва барқарор этиш, институционал ва кадлар салоҳиятини оширишдаги лойиҳалар ҳақида тўхталиб ўтдилар.
Давра суҳбати давомида барча иштирокчилар билан очиқ мулоқот ташкил қилиниб, халқаро ҳамкорликни янада ривожлантириш, илғор тажрибаларни жорий этиш ва қўшма лойиҳаларни амалга ошириш юзасидан фикр ва таклифлар алмашилди.
Тадбир якунида давлат харидлари ва саноат кооперацияси соҳаларида халқаро ҳамкорликни янада мустаҳкамлаш, илмий муассасалар, халқаро ташкилотлар ва хусусий сектор ўртасидаги ҳамкорликни кенгайтириш бўйича ўзаро келишувларга эришилди.