Маҳалла раислари учун аҳоли билан мулоқот ва мурожаатлар билан ишлаш бўйича семинар ўтказилди
2026-11-17 10:30:00 / Янгиликлар

Фарғона тумани ҳокимлигида вилоят ҳокимлиги Мурожаатлар билан ишлаш бўлими бошлиғи М. Ахунжанова ҳамда вилоят Маҳаллалар уюшмаси бошқармаси бошлиғи А. Зиявиддинов бошчилигида маҳалла раислари иштирокида семинар ташкил этилди. Унда аҳоли билан мулоқотни самарали ташкил этиш ва фуқаролар мурожаатлари билан ишлаш масалалари муҳокама қилинди.
Семинарда М. Ахунжанова Ўзбекистон Республикаси Президентининг 2026 йил 1 апрелдаги ПФ-51-сонли «Аҳоли билан мулоқот тизимини самарали ташкил қилиш бўйича қўшимча чора-тадбирлар тўғрисида»ги Фармонининг мазмун-моҳияти, унда белгиланган устувор вазифалар ҳамда маҳаллаларда мурожаатлар билан ишлашда қонунчилик талабларига қатъий риоя этиш юзасидан тушунтириш ва амалий тавсиялар берди.
Шунингдек, «Жисмоний ва юридик шахсларнинг мурожаатлари тўғрисида»ги Қонун талабларига мувофиқ, ҳар бир мурожаатни холисона, тўлиқ ва ўз вақтида кўриб чиқиш, муаммоларни жойида ўрганиш ҳамда фуқароларнинг қонуний манфаатларини ҳимоя қилиш муҳимлиги таъкидланди.
Семинар якунида маҳалла раисларига аҳоли билан очиқ ва самарали мулоқотни йўлга қўйиш, мурожаатларга бефарқ бўлмаслик ва уларнинг ижобий ҳал этилиши учун масъулиятни янада ошириш юзасидан тавсиялар берилди.






