Фарғона туманида “Яшил макон” лойиҳаси доирасида кўкаламзорлаштириш ишлари бошланди
2026-11-13 17:30:00 / Янгиликлар

Фарғона тумани “Дўстлик” ва “Юқори Арча” маҳаллалари ҳудудидаги 105 гектар қир-адирлик майдонида “Яшил макон” умуммиллий лойиҳаси доирасида жорий йилги дарахт кўчатларини экиш ҳамда томчилатиб суғориш тизимини жорий этиш ишларига старт берилди.
Ташкил этилган тадбирда Экология ва иқлим ўзгариши миллий қўмитасининг Фарғона вилояти бошқармаси бошлиғи Алишер Аҳмедов, Фарғона тумани ҳокими Нодиржон Машрапов, ҳоким ўринбосарлари, тумандаги корхона, ташкилот ва муассасалар раҳбарлари ҳамда ходимлари, маҳалла фаоллари, нуронийлар ва ёшлар етакчилари иштирок этди.
Тадбир давомида жами 1 500 туп каштан, заранг, павлония, акация, қайрағоч каби манзарали дарахтлар, шунингдек, турли хил мевали дарахт ва бута кўчатлари экилди.
Лойиҳа доирасида кўчатларни самарали парваришлаш, сув ресурсларидан оқилона фойдаланиш ҳамда уларнинг яхши ривожланишини таъминлаш мақсадида томчилатиб суғориш тизимини жорий этиш ҳам кўзда тутилган.









