Фарғона тумани ихтисослаштирилган мактаби битирувчиси нуфузли халқаро университет талабаси бўлди
2026-07-15 22:00:00 / Янгиликлар
Ихтисослаштирилган таълим муассасалари агентлиги тизимидаги Фарғона тумани ихтисослаштирилган мактабининг битирувчиси Муслимбек Обидов халқаро олий таълим муассасалари рейтингида юқори ўринларни эгаллаб келаётган Korea University университетига муддатидан олдин талабаликка қабул қилинди.
Дунёнинг нуфузли олий таълим муассасалари қаторидан жой олган мазкур университетга ўқишга қабул қилиниши Муслимбекнинг йиллар давомида олиб борган изчил меҳнати, билимга бўлган интилиши ва салоҳиятининг юксак эътирофи ҳисобланади.
Ёшларнинг халқаро миқёсдаги муваффақиятлари мамлакатимизда таълим соҳасида амалга оширилаётган ислоҳотлар, иқтидорли ўқувчиларни қўллаб-қувватлаш ҳамда уларнинг замонавий билим ва кўникмаларни эгаллаши учун яратилаётган кенг имкониятларнинг амалий самарасидир.
Фарғона тумани ҳокимлиги, Халқ депутатлари туман Кенгаши ва жамоатчилик номидан Муслимбек Обидовни ушбу улкан ютуғи билан самимий муборакбод этиб, келгусидаги таълим ва илмий фаолиятида улкан муваффақиятлар ҳамда янги зафарлар тилаймиз.