Фарғона тумани ҳокимлиги

Фарғона туманида сув ресурсларидан самарали фойдаланиш, қишлоқ хўжалиги ишлаб чиқаришини барқарор ривожлантириш ҳамда суғориш тизимларини модернизация қилиш борасида муҳим инвестицион лойиҳа муваффақиятли амалга оширилди.

Хусусан, туманнинг “Бирдамлик” маҳалла фуқаролар йиғини ҳудудида “Фарғона водийси сув ресурсларини бошқариш. Фаза-2” лойиҳаси доирасида Хитойнинг “China Nuclear Industry 22nd Construction Co. LTD” компанияси томонидан қарийб 30 миллион АҚШ доллари миқдоридаги инвестиция маблағлари ҳисобидан 2025–2026-йиллар давомида “Аввал-Лоғон” насос станцияси қуриб битказилди.

Мазкур иншоотнинг тантанали очилиш маросими кенг жамоатчилик иштирокида ўтказилди. Тадбирда Фарғона вилояти ҳокимининг қишлоқ ва сув хўжалиги масалалари бўйича ўринбосари Алибек Турсунов, “Сирдарё–Сўх” ирригация тизимлари ҳавза бошқармаси бошлиғи Фахриддин Турсунов, вилоят Насос станцияларидан фойдаланиш бошқармаси бошлиғи Алоҳиддин Муқимжонов, Фарғона тумани ҳокими Хамидулло Иномов, мутасадди ташкилотлар раҳбарлари, маҳалла фаоллари ҳамда нуронийлар иштирок этди.

Техник жиҳатдан замонавий талабларга тўлиқ жавоб берадиган ушбу насос станциясида қуввати 2000 кВт бўлган 3 дона ASP350-780R.6 русумидаги агрегатлар ўрнатилган бўлиб, улар орқали 9,3 километр масофага 1200 миллиметр диаметрили қувурлар орқали сониясига 0,670 куб/метр ҳажмда сув етказиб бериш имконияти яратилган. Станциянинг фойдали иш коэффициенти 85–90 фоизни ташкил этади.

Шунингдек, станция “Марғилонsoy” каналидан сув қабул қилиб, уни “Лоғон” каналига етказиб беради. Сув узатиш қуввати сониясига 2 куб метрни ташкил этиб, мазкур лойиҳа орқали қарийб 4754 гектар экин ер майдонларининг сув таъминоти сезиларли даражада яхшиланади.

Тадбир давомида иштирокчилар янги насос станцияси имкониятлари, замонавий техник ускуналар ва автоматлаштирилган бошқарув тизими билан яқиндан танишдилар.