Фарғона туманида саноат ва энергетика соҳасини ривожлантириш масалалари муҳокама қилинди
2026-01-29 16:45:00 / Янгиликлар
Фарғона тумани ҳокими ўринбосари Акбаржон Ахроров “Shenglong Electric Group Power Engineering Co., LTD” корхонасига ишчи ташриф билан борди. Мазкур ташриф туман ҳудудида саноат ва энергетика соҳасини янада ривожлантириш, илғор хорижий тажрибаларни жорий этиш ҳамда ишлаб чиқариш салоҳиятини оширишга қаратилди.
Ташриф давомида ҳоким ўринбосари корхонанинг электр узатиш ва тақсимлаш ускуналари, ақлли энергия тизимлари ҳамда EPC хизматлари йўналишида олиб борилаётган ишлаб чиқариш жараёнлари билан яқиндан танишди. Корхонанинг глобал миқёсдаги энергия лойиҳаларидаги иштироки, шунингдек замонавий технологиялар асосида юқори сифатли маҳсулотлар ишлаб чиқаришга қаратилган фаолияти алоҳида эътироф этилди.
Учрашув чоғида корхона раҳбарияти билан ишчи жараёнларни янада такомиллаштириш, инновацион технологияларни кенг жорий этиш, маҳаллий ишчи кучини қўллаб-қувватлаш ҳамда янги иш ўринларини яратиш масалалари муҳокама қилинди. Шунингдек, ишлаб чиқариш ҳажмини ошириш, экспорт салоҳиятини кенгайтириш ва ўзаро манфаатли ҳамкорликни ривожлантириш бўйича қатор таклиф ва тавсиялар билдирилди.
Мазкур ишчи ташриф ҳудудда саноатни модернизация қилиш, инвестициявий муҳитни яхшилаш ва барқарор иқтисодий ривожланишни таъминлаш йўлидаги муҳим қадам сифатида баҳоланди.