Электр транспорт соҳасида янги имкониятлар: Фарғона тумани делегациясининг Хитойга ташрифи
2026-01-26 11:05:00 / Янгиликлар
Фарғона тумани делегацияси Хитой Халқ Республикасининг Шандун провинцияси, Вейфанг шаҳрида жойлашган “Weichan New Energy Commercial Vehicle Co., LTD” компаниясига амалий ташриф буюрди. Мазкур корхона кичик электр автомобиллари ҳамда электр юк автомобилларини ишлаб чиқаришга ихтисослашган бўлиб, экологик тоза транспорт воситалари бозорида муҳим ўрин эгаллайди.
Ташриф давомида делегация аъзолари корхонанинг ишлаб чиқариш жараёнлари, технологик линиялари, маҳсулот турлари ҳамда электр транспорт воситаларини яратишда қўлланилаётган замонавий ечимлар билан яқиндан танишдилар. Компания мутахассислари томонидан ишлаб чиқариш қувватлари, маҳсулотларнинг техник кўрсаткичлари ҳамда экспорт салоҳияти юзасидан батафсил тақдимотлар ўтказилди.
Учрашув чоғида электр транспорт воситаларини Фарғона туманида ишлаб чиқариш ёки йиғиш, инвестиция лойиҳаларини амалга ошириш, янги иш ўринларини яратиш ҳамда узоқ муддатли, ўзаро манфаатли ҳамкорликни йўлга қўйиш масалалари атрофлича муҳокама қилинди.