«Янги аср» МФЙда қурилиш билан боғлиқ мурожаат тезкорлик билан бартараф этилди
2026-01-08 18:00:00 / Расмий муносабатлар
Фуқаролар томонидан йўлланган Фарғона тумани «Янги аср» маҳалла фуқаролар йиғини ҳудудида қурилиши давом этаётган кўп қаватли уйларнинг ертўласида қурилиш чиқиндилари тўпланиб қолгани, ушбу ҳолат аҳоли учун ноқулайлик туғдираётгани ҳамда бино олд қисмига дереза ромлари ўрнатилмагани юзасидан видео мурожаат Farg‘ona tuman hokimligi томонидан назоратга олинди.
Мазкур мурожаат юзасидан туман ҳокимлигининг тегишли ўринбосарлари, масъул ташкилот раҳбарлари ва вакиллари иштирокида жойига чиқиб ўрганиш ишлари олиб борилди. Ўрганиш жараёнида аниқланган камчиликлар шу куннинг ўзидаёқ бартараф этилди: ертўладаги қурилиш чиқиндилари тозаланди ҳамда бино олд қисмига дереза ромлари ўрнатилди.
Кўрилган тезкор чоралар натижасида ҳудуд аҳолиси учун қулай шарт-шароитлар яратилди ҳамда фуқаролар мурожаатларига ўз вақтида ва самарали муносабат билдириш таъминланди.