Фарғона туманида “Анвар Хожи ота” маҳалла маркази фойдаланишга топширилди
2025-12-18 09:05:00 / Янгиликлар
Фарғона тумани “Оқтом” маҳалла фуқаролар йиғини ҳудудида тадбиркор Ранжидахон Абдувалиева ташаббуси билан “Анвар Хожи ота” номли маҳалла маркази қурилиб, фойдаланишга топширилди. Мазкур маҳалла гузари тадбиркорнинг шахсий маблағлари ҳисобидан барпо этилиб, маҳалла инфратузилмасини янада ривожлантиришга хизмат қилмоқда.
Маҳалла марказида аёллар учун фитнес клуби, хорижий тилларни ўрганиш ҳамда пазандачилик йўналишларида тўгараклар ташкил этилган бўлиб, улар ҳозирда фаолият олиб бормоқда. Ушбу марказ орқали ҳозирга қадар 4 нафар маҳалла аёлларининг бандлиги таъминланди.
Маҳалла марказининг тантанали очилиш маросимида Фарғона туман ҳокими ўринбосари — Оила ва хотин-қизлар бўлими бошлиғи Хамидахон Абдуганиева, маҳалла фаоллари, нуронийлар ҳамда маҳалла ёшлари иштирок этдилар.
Тадбир давомида сўзга чиққанлар маҳаллада хотин-қизлар ва ёшларнинг бандлигини таъминлаш, уларнинг касб-ҳунар ўрганиши ва ижтимоий фаоллигини ошириш йўлида амалга оширилган ушбу эзгу ташаббус учун тадбиркорга миннатдорчилик билдирдилар.