Чортоқ туманидаги “Нуронийлар” масканида оилани мустаҳкамлаш, оилавий ажримларнинг олдини олиш ва соғлом турмуш тарзини тарғиб қилишга қаратилган тарғибот тадбири бўлиб ўтди.
2025-06-14 12:00:00 / Янгиликлар
Унда маҳаллаларда фаолият юритаётган нуронийлар, зиёлилар, кексалар кенгаши аъзолари, ҳаёт тажрибаси бой онахонлар иштирок этишди. Улар замонавий оиладаги муаммолар, ажримларнинг ортиши, ўзаро тушунмовчиликлар, тарбиядаги бўшлиқлар ҳақида атрофлича фикр алмашишди.
Қайд этилдики, мустаҳкам оила — соғлом жамият пойдеворидир. Шу боис, маҳаллаларда оилалар билан индивидуал тарзда иш олиб бориш, ота-оналарни ҳуқуқий ва психологик жиҳатдан қўллаб-қувватлаш, ажримларга олиб келувчи сабабларни бартараф этиш бўйича мақсадли чора-тадбирларни белгилаш муҳим вазифадир.
Тадбир давомида маҳаллада муаммоли оилалар билан ишлашда нуронийлар иштирокини кенгайтириш, соғлом турмуш тарзи ва маънавий ёндашувни кучайтириш лозимлиги таъкидланди.
Шунингдек, тадбир сўнгида ҳудудларда амалга оширилиши зарур бўлган вазифалар белгилаб олинди.
