Наманган вилояти Чортоқ тумани ҳокимлиги

Чортоқ туманида замонавий нодавлат таълим муассасасининг янги филиали иш бошлади Чортоқ туманида таълим соҳасида хусусий секторни ривожлантириш, ёшларга замонавий билим ва кўникмалар бериш борасидаги ишлар изчил давом этмоқда. Ана шундай муҳим лойиҳалардан бири сифатида “NIS” нодавлат мактабининг 7-филиали фаолияти йўлга қўйилди. Янги таълим муассасасининг очилиш маросимида ДХХнинг Наманган вилояти бўйича бошқармаси бошлиғи, вилоят ИИБ, туман раҳбарияти, кенг жамоатчилик ва ёшлар иштирок этди. Тадбиркор Муҳаммад Элёр Юлдашев ташаббуси билан ташкил этилган мазкур мактабда ўқувчиларга халқаро таълим дастурлари асосида билим берилади. Таълим жараёнида инглиз, рус ва хитой тилларини чуқур ўргатиш билан бир қаторда IT дастурлаш, робототехника, киберхавфсизлик, стартап лойиҳалар, сунъий интеллект, дрон ва ракета моделсозлиги каби замонавий йўналишларга алоҳида эътибор қаратилади. Қувонарлиси, мазкур таълим муассасасида таҳсил олган мингдан ортиқ ўқувчилар турли халқаро тил ва фан сертификатларини қўлга киритишган. Шунингдек, 100 га яқин стартап лойиҳалар амалга оширилган. Янги ўқув биноси 700 нафар ўқувчига мўлжалланган бўлиб, барча замонавий талабларга жавоб берадиган шарт-шароитлар яратилган. Дарс жараёнларига хорижий мутахассис ва ўқитувчилар жалб этилгани таълим сифати ва самарадорлигини янада оширишга хизмат қилади. Лойиҳани амалга ошириш учун 8,5 миллиард сўм маблағ йўналтирилди. Шу билан бирга, муассаса фаолияти йўлга қўйилиши натижасида 45 та янги иш ўрни яратилди. Мазкур мактаб ёшларни замонавий касб ва технологияларга йўналтириш, уларнинг халқаро билим ва малакага эга бўлишларида муҳим аҳамият касб этади.