Наманган вилояти ҳокими Шавкатжон Абдураззоқов бугун Чортоқ туманида бўлиб, амалга оширилаётган қурилиш-бунёдкорлик ишлари ва муҳим лойиҳалар билан танишди.
2025-12-23 14:45:00 / Янгиликлар
Бугунги кунда туманда замонавий инфратузилма яратиш ва ҳудудларни комплекс ривожлантириш ишлари жадал суръатларда олиб борилмоқда.
Хусусан, "Катта Наманган" каналининг Бобур массивигача бўлган қисмида бетонлаш ишлари босқичма-босқич давом этяпти.
Шу билан бирга, Фурқат номли маданият ва истироҳат боғини реконструкция қилиш жараёнида боғнинг умумий инфратузилмаси замон талабларига мос равишда янгиланиб, замонавий архитектура ечимлари, аҳоли учун қулай шарт-шароитлар, ёритиш ва яшил ҳудуд тизимлари босқичма-босқич барпо этилмоқда.
Шунингдек, “Чортоқ сойининг Бешкапа маҳалласи ҳудудидан Наманган маҳалласигача бўлган 1,5 километр қисмини каскадлаш” ҳамда сой бўйлаб экойўлак қуриш лойиҳалари асосида қурилиш-монтаж ва ҳудудни ободонлаштириш ишлари белгиланган дастур доирасида жадал суръатларда амалга оширилмоқда.
Вилоят раҳбари жойлардаги қурилиш суръатлари ва иш сифатини атрофлича ўрганиб, масъулларга ишларни сифат ва меъёр талаблари даражасида давом эттириш бўйича аниқ кўрсатмалар берди.
Бугунги кунда туман марказида ўрнатилган "Янги йил арчаси" байрамнинг асосий рамзига айланиб, аҳоли ва меҳмонларга кўтаринки кайфият улашмоқда.
Вилоят ҳокими ўрганишлари доирасида мазкур ҳудудда ҳам бўлиб, аҳоли учун қулай, хавфсиз ва маданий ҳордиқ чиқаришга мос муҳит яратиш, байрам кунларида фавқулодда вазиятлар гуруҳлари шайлиги, жамоат тартиби ва хавфсизликни таъминлаш бўйича масъулларга топшириқлар берди.
