Камбағалликдан фаровонлик сари — ҳар бир ёшга муносиб иш ва барқарор даромад манбаи!
2026-08-05 10:25:00 / Янгиликлар
Пайшанба — «Ёшлар куни» муносабати билан Учқўрғон туманидаги Уз ТEХ Гроуп корхонасида меҳнат бозорига кириб келаётган ёшлар учун «Бўш иш ўринлари» меҳнат ярмаркаси ташкил этилди.
Мазкур меҳнат ярмаркаси Ўзбекистон Республикаси Президентининг 2024 йил 23-центабрдаги ПҚ-330-сонли «Камбағалликдан фаровонлик сари» дастури ижросини таъминлаш, аҳоли, айниқса кам таъминланган оилалар, ишсиз ёшлар ва хотин-қизларнинг бандлигини ошириш ҳамда улар учун барқарор даромад манбаларини яратиш мақсадида ўтказилди.
Тадбирда меҳнат бозорига кириб келаётган 205 нафар ёш иштирок этди. Уларга тумандаги 30 дан ортиқ корхона ва ташкилот томонидан жами 295 та бўш иш ўрни таклиф қилинди. Ярмарка давомида иштирокчилар иш берувчилар билан бевосита мулоқот қилиб, ўз малака ва қизиқишларига мос бўлган иш ўринлари билан танишиш имкониятига эга бўлдилар.
Ярмарка якунларига кўра, 45 нафар фуқарога доимий ишга жойлашиш учун йўлланма берилди, 34 нафар фуқаро касб-ҳунарга ўқитиш курсларига йўлланма олди. Шунингдек, 126 нафар иштирокчига меҳнат қонунчилиги, бандлик, тадбиркорлик фаолиятини йўлга қўйиш ҳамда мавжуд имтиёз ва имкониятлар юзасидан ҳуқуқий ва амалий маслаҳатлар берилди.
Тадбирда Ички ишлар органларининг жиноят ишлари бўйича пробация гуруҳи назоратида турган шахслар ҳам фаол иштирок этди. Улар учун меҳнат бозорига интеграциялашиш, доимий иш билан таъминланиш ва жамиятга муваффақиятли мослашишга хизмат қилувчи имкониятлар яратилди.
Бундай меҳнат ярмаркалари аҳоли бандлигини таъминлаш, фуқароларнинг турмуш даражасини юксалтириш, ижтимоий ҳимояга муҳтож қатламларни қўллаб-қувватлаш ҳамда ёшларнинг иқтисодий фаоллигини оширишда муҳим аҳамият касб этади. Энг муҳими, бу каби амалий тадбирлар «Камбағалликдан фаровонлик сари» дастурида белгиланган мақсад ва вазифаларнинг изчил амалга оширилишига хизмат қилмоқда. https://t.me/NamanganBandlik