Бухоро тумани: “Porloq Istiqbol Muhriddin” фермер хўжалиги такрорий экинлардан мўмай даромад олмоқда
2026-11-18 14:30:00 / Янгиликлар

Бухоро тумани Қўшҳодим маҳалласида фаолият юритаётган “Porloq Istiqbol Muhriddin” фермер хўжалиги қишлоқ хўжалиги ерларидан оқилона ва самарали фойдаланиш, такрорий экин экиш орқали қўшимча даромад олиш борасида яхши натижаларга эришмоқда.
Фермер хўжалиги раҳбари Муҳсин Шодиев бошчилигида жами 30 гектар ер майдонида деҳқончилик ишлари олиб борилмоқда. Шундан 10 гектарига ғалла экилган бўлиб, ҳосил йиғиб олингач, бўшаган ер майдонларидан унумли фойдаланишга алоҳида эътибор қаратилган.
Жумладан, ғалладан бўшаган майдонларнинг 3 гектарида фермер хўжалигининг ўзи сабзи етиштиришни йўлга қўйган. Қолган майдонлар эса маҳалла аҳолисига такрорий экин экиш учун тақсимлаб берилган. Бу орқали нафақат ернинг самарадорлигини ошириш, балки аҳолига ҳам ўз меҳнати билан қўшимча даромад топиш имконияти яратилган.
Бугунги кунда сабзи етиштиришда эришилган натижалар ҳам эътиборга молик. Ҳар бир гектар майдондан ўртача 40 тоннадан ҳосил олиниб, 3 гектар майдондан жами 120 тонна маҳсулот етиштирилмоқда. Бу кўрсаткич фермер хўжалигининг ерга бўлган эътибори, деҳқончиликдаги тажрибаси ва самарали меҳнати натижасидир.
Фермер хўжалигининг яна бир эътиборга молик жиҳати — етиштирилган маҳсулотни сотиш масаласига бўлган ёндашувидир. Ҳозирги вақтда бозорларда сабзининг бир килограмми ўртача 2 500 сўмдан сотилаётган бўлса-да, фермер маҳсулотни шошилинч равишда сотиш ўрнига, уни махсус совуткичли омборларда сақлашни режалаштирган.
Асосий мақсад — сабзини сифатини йўқотмаган ҳолда сақлаб, эрта баҳорда бозорларга чиқариш ва мавсумий талабдан самарали фойдаланиш орқали хўжалик даромадини янада ошириш. Бу ёндашув қишлоқ хўжалигида маҳсулот етиштириш билан бир қаторда уни сақлаш ва бозорга қулай вақтда чиқариш ҳам муҳим иқтисодий аҳамиятга эга эканини кўрсатади.
Албатта, бундай тажрибалар қишлоқ хўжалиги ерларидан йил давомида самарали фойдаланиш, такрорий экинлар ҳисобига озиқ-овқат маҳсулотлари етиштириш ҳажмини кўпайтириш, аҳоли бандлиги ва даромадларини оширишда муҳим ўрин тутади.
Муҳсин Шодиев бошчилигидаги фермер хўжалиги фаолияти шуни кўрсатадики, мавжуд имкониятлардан оқилона фойдаланиш, меҳнат ва ташаббусни бирлаштириш орқали ернинг ҳар бир қаричидан унумли фойдаланиш, мўл ҳосил етиштириш ва қўшимча даромад манбаларини яратиш мумкин.
Зеро, ердан самарали фойдаланиш — мўл ҳосил, барака ва аҳоли фаровонлигининг муҳим омилидир!









