Бухоро туманида умумтаълим мактабларининг куз-қиш мавсумига тайёргарлик ҳолати ўрганилди
2026-11-11 12:30:00 / Янгиликлар

Айни кунларда тумандаги ижтимоий соҳа объектларини куз-қиш мавсумига пухта тайёрлаш, мавжуд муаммоларни ўз вақтида бартараф этиш ҳамда аҳоли, хусусан, таълим муассасаларида таҳсил олаётган ўқувчилар учун муносиб шароитлар яратишга алоҳида эътибор қаратилмоқда.
Шу мақсадда Бухоро тумани ҳокими Анваржон Очилов тумандаги умумтаълим мактабларида куз-қиш мавсумига тайёргарлик жараёнларини жойига чиққан ҳолда кўздан кечирди.
Жумладан, 14-, 15- ва 50-сонли умумтаълим мактабларида олиб борилган ўрганишлар давомида таълим муассасаларининг умумий ҳолати, ўқув биноларининг техник жиҳатдан созлиги, иситиш тизимларининг мавсумга тайёргарлиги, синфхоналарда меъёрий ҳароратни таъминлаш имкониятлари, дераза ва эшикларнинг иссиқликни сақлаш ҳолати ҳамда бошқа муҳим масалалар кўриб чиқилди.
Шунингдек, мактабларда мавжуд иситиш ускуналари ва муҳандислик-коммуникация тармоқларининг ишлаш ҳолати, зарур ёқилғи захираларининг шакллантирилиши, электр энергияси таъминоти ҳамда қиш мавсумида юзага келиши мумкин бўлган муаммоларнинг олдини олиш масалаларига ҳам эътибор қаратилди.
Ўрганишлар давомида таълим муассасаларида мавжуд имкониятлардан самарали фойдаланиш, аниқланган камчиликларни ўз вақтида бартараф этиш, иситиш тизимларининг узлуксиз ишлашини таъминлаш ва мавсум давомида юзага келиши мумкин бўлган носозликларга тезкор муносабат билдириш зарурлиги таъкидланди.
Туман ҳокими томонидан масъул раҳбар ва мутасаддиларга ҳар бир мактабнинг мавжуд ҳолатидан келиб чиқиб, зарур чора-тадбирларни белгилаш, таъмирлаш талаб этиладиган қисмларни тартибга келтириш, иситиш тизимларининг созлигини доимий назорат қилиш ҳамда белгиланган вазифалар ижросини таъминлаш юзасидан тегишли топшириқлар берилди.
Таъкидлаш жоизки, куз-қиш мавсумига пухта тайёргарлик кўриш нафақат таълим муассасаларининг моддий-техник ҳолатини яхшилаш, балки ўқувчиларнинг саломатлигини муҳофаза қилиш, улар учун қулай таълим муҳитини яратиш ҳамда дарс машғулотларининг узлуксизлигини таъминлашда ҳам муҳим аҳамият касб этади.
Бу борадаги ўрганишлар ва назорат тадбирлари тумандаги бошқа ижтимоий соҳа объектларида ҳам изчил давом эттирилади.








